--
މިއަހަރު ވެގެން ގޮސްފައިމިވަނީ ބޮލީވުޑުގެ މަޝްހޫރު ގިނަ ފިލްމުތަކެއްގެ ސީކުއެލް ނިކުތް އަހަރެކެވެ. އެހެންކަމުން އަހަރު ނިމުމުގެ ކުރިން މި ސީކުއެލް ފިލްމުތަކަށް ބަލާލަމާ ހިނގާށެވެ.
1. ސްޓްރީ 2
ހޮރޯ ކޮމެޑީ ފިލްމު "ސްޓްރީ 2" އަކީ 2018 ވަނަ އަހަރު ރިލީޒްކުރި "ސްޓްރީ" ގެ ސީކުއެލް އެކެވެ. ފިލްމުގެ ދެވަނަ ބައިންވެސް ފެނިގެންގޮސްފައި މިވަނީ ހަމަ ފުރަތަމަ ބައިންވެސް ފެނިގެންދިޔަ ތަރިންނެވެ. އެގޮތުން ރާޖްކުމާރު ރާއޯ، ޝްރަދާ ކަޕޫރު، އަބީޝެކް ބެނާޖީ، އަޕަރްޝަކްތީ ކުރާނާ އަދި ޕަންކަޖް ތުރިޕަތީ ފެނިގެންދެއެވެ. އަމަރް ކޯޝިކް ޑައިރެކްޓްކުރި މި ފިލްމުގައި މި ގޭންގުން ކުރިމަތިލާން ޖެހޭނީ ޗަންޑޭރީގައި އަންހެނުން ގެއްލުވާލުމުގެ ފަހަތުގައި ހުރި ފުރޭތައެއް ކަމަށްވާ ސަރްކަތާއާ އެވެ. "ސްޓްރީ 2" އަކީ މި އަހަރުގެ އެންމެ ކާމިޔާބު އެއް ފިލްމެވެ.
2- ބޫލް ބުލައްޔާ 3
"ބޫލް ބުލައްޔާ 3" ގައި ފެނިގެންދިޔައީ ކާތިކް އާރްޔަން, ޓްރިޕްޓީ ޑިމްރީ، ވިދްޔާ ބާލަން އަދި މަދޫރީ ޑިކްސިޓްއެވެ. މިއީ "ބޫލް ބުލައްޔާ" ގެ ތިން ވަނަ ފިލްމެވެ. މީގެ ކުރިން "ބޫލް ބުލައްޔާ" އާއި "ބޫލް ބުލައްޔާ 2" ވަނީ ރިލީޒްކޮށްފައިއެވެ. "ބޫލް ބުލައްޔާ" ގެ ފުރަތަމަ ބައިން ވިދްޔާ ފެނިގެންގޮސްފައިވާއިރު ދެވަނަބައިގައިވެސް ރޫހް ބާބާ ގެ ރޯލުން ފެނިގެންގޮސްފައިވަނީ 3 ވަނަބައިގައިވެސް އެރޯލުން ފެނިގެންދާ ކާތިކްއެވެ. މި ފިލްމުގައި ރޫހް ބާބާ އަށް މިފަހަރު ކުރިމަތިލާން ޖެހެނީ ދެ މަންޖުލިކާ އެކެވެ. "ބޫލް ބުލައްޔާ 3" އަކީ އަނީސް ބަޒްމީ ޑައިރެކްޓްކޮށްފައިވާ ފިލްމެކެވެ. މި ފިލްމަށްވެސް ބެލުންތެރިންގެ ވަރަށް ބޮޑު ތަރުހީބެއް ލިބިގެންދިޔައެވެ.
3- ސިންގަމް އެގެއިން
ދިވާލީގައި ރިލީޒްކުރި "ބޫލް ބުލައްޔާ 3" ބޮކްސް އޮފީހުގައި ކުރިމަތިލީ މަޝްހޫރު އެހެން ފްރެންޗައިޒް ފިލްމެއް ކަމަށްވާ "ސިންގަމް އެގެއިން" އާ އެވެ. ރޯހިތު ޝެޓީގެ މިފިލްމުގެ ކާސްޓުންގެ ތެރޭގައި އަޖޭ ދޭވްގަން، ކަރީނާ ކަޕޫރު ޚާން، ރަންވީރު ސިންގް، އަކްޝޭ ކުމާރު، ދީޕިކާ ޕަދުކޯން، ޓައިގާ ޝްރޮފް، އަރުޖުން ކަޕޫރު އަދި ޖެކީ ޝްރޮފް ހިމެނެ އެވެ. ރާމަޔަންގެ ރެފަރެންސްތަކުން ފުރިފައިވާ މި ފިލްމުގައި ބަޖީރާއޯ ސިންގަމް އަށް ޖެހެނީ އޭނާގެ އަންހެނުން ޓެރަރިސްޓެއްގެ ކިބައިން ސަލާމަތް ކުރާށެވެ.
4. ފިރް އައި ހަސީން ދިލްރުބާ
"ފިރް އާއީ ހަސީން ދިލްރުބާ" އަކީ 2021 ވަނަ އަހަރު ނިކުތް ރޮމޭންޓިކް ތުރިލާ "ހަސީން ދިލްރުބާ" ގެ ސީކުއެލް އެކެވެ. ރާނީ އާއި ރިޝޫގެ ރޯލުން ތާޕްސީ ޕަންނޫ އާއި ވިކްރާންތު މެސީ އެނބުރި އައިއިރު ސަނީ ކޯޝަލް އަބިމަންޔޫގެ ރޯލުން ފެނިގެންދިޔައެވެ. މި ފިލްމުގެ ޑައިރެކްޓަރަކީ ޖައިޕްރަދު ދޭސާއީ އެވެ. "ފިރް އައި ހަސީން ދިލްރުބާ" ގައި ރާނީ އާއި ރިޝޫ އަދިވެސް އުޅެނީ ފުލުހުންނަށް ފިލައިގެންނެވެ. މި ފިލްމަކީ ޓްވިސްޓް އެންޑް ޓާންސްތަކުން ފުރިފައިވާ ފިލްމެކެވެ.
5. ކާގަޒް 2
"ކާގަޒް 2" އަކީ އަންހެން ދަރިފުޅު ގެއްލުމުގެ އިންސާފު ހޯދަން މަސައްކަތްކުރަން ނިންމި މީހެއްގެ ވާހަކަ އެވެ. ވީކޭ ޕްރަކާޝް ޑައިރެކްޓްކޮށްފައިވާ މި ފިލްމުގެ ކާސްޓުންގެ ތެރޭގައި އަނޫޕަމް ކޭރް، ސަތީޝް ކޯޝިކް، ނީނާ ގުޕްތާ، ދަރްޝަން ކުމާރު އަދި ސްމްރިތީ ކަލްރާ ހިމެނެ އެވެ. މިއީ 2021 ވަނަ އަހަރު ރިލީޒްކުރި "ކާގާޒް" ގެ ސީކުއެލް އެކެވެ.
މި ފެށޭ އަހަރާއިއެކުވެސް ބޮލީވުޑުގެ ގިނަ ސީކުއެލްތަކެއް ފެނިގެންދާނެކަމަށް ބެލެވެއެވެ. އެގޮތުން "ޖޯލީ އެލްއެލްބީ 3"، "ރެއިޑް 2"، "ހައުސްފުލް 5"، "ވޯ 2" ފަދަ ސީކުއެލްތައް ރިލީޒްކުރަން ތައްޔާރުވާ ކަމުގެ އަޑުތައް އިވެއެވެ.
މި އަހަރު ސީކުއެލްތަކުން އެންމެ ކަމުދިޔައީކޮން ފިލްމެއް ހެއްޔެވެ؟ އަދި 2025 ވަނަ އަހަރު އެންމެ ބޮޑަށް އިންތިޒާރު ކުރަނީ ކޮން ފިލްމަކަށް ހެއްޔެވެ؟
ފަހުގެ
