ފަސޭހަކަމާއެކު ހަވަރު ސްޕޯޓްސް ކުލަބު ބަލިކޮށް އެޕެކްސް ޗެންޕިއަންކަން ހޯދައިފި

ތިނަދޫ ސިޓީގައި މިހާރު ކުރިއަށްދާ ގދ. އަތޮޅު ކައުންސިލް ބެޑްމިންޓަން މުބާރާތުގެ ފައިނަލުގައި ހަވަރު ސްޕޯޓްސް ކުލަބާއި ޓީމު އެޕެކްސް ވާދަކުރި މެޗު 3-0 ގެ ނަތީޖާއަކުން މޮޅުވެ އެޕެކްސް އިން މުބާރާތުގެ ޗެންޕިއަންކަން ހޯދައިފިއެވެ.

މިމެޗުގެ މެންސް ސިންގަލް ގޭމުގައި ސަންދީބު (ހަވަރު ސްޕޯޓްސް) އާއި އަޖޭ ދަންކަރު (ޓީމު އެޕެކްސް) ވާދަކޮށް 2-0 ގެ ނަތީޖާއަކުން ކާމިޔާބުކުރީ އަޖޭ ދަންކަރު އެވެ. މިގޭމުގައި އަޖޭ ދަންކަރު ދެ ސެޓް ވެސް ކާމިޔާބުކުރީ ވާދަވެރި ކުޅުމަކަށްފަހު 21-11 ގެ ނަތީޖާއަކުންނެވެ

ވުމެންސް ސިންގަލް ގޭމުގައި އައިޝަތު އިބްރާހިމް (ހަވަރު ސްޕޯޓްސް) އާއި އައިކާ ޚަލީލް (ޓީމު އެޕެކްސް) ވާދަކޮށް 2-1 ގެ ނަތީޖާއަކުން ކާމިޔާބުކުރީ އައިކާ އެވެ. މިގޭމުގައި އައިކާ ފުރަތަމަ ސެޓް 12-21 ގެ ނަތީޖާއަކުން ކާމިޔާބުކުރިއިރު، ދެވަނަ ސެޓް 21-19 ގެ ނަތީޖާއަކުން ކާމިޔާބުކުރީ އައިޝަތު އިބްރާހިމް އެވެ. އަދި މެޗުގެ ތިންވަނަ ސެޓް އައިކާ ކާމިޔާބުކުރީ 14-21 ގެ ނަތީޖާއަކުންނެވެ.

މެންސް ޑަބަލްސް ގޭމުގައި ހަވަރު ސްޕޯޓްސްގެ އިބްރާހިމް ނަޝީދު އަދި އަހުމަދު ޒިޔާދުﷲ އާއި ޓީމު އެޕެކްސްގެ އަޖޭ ދަންކަރު އަދި މުހައްމަދު ނިޒާރު ވާދަކޮށް 2-0 ގެ ނަތީޖާއަކުން ކާމިޔާބުކުރީ ޓީމު އެޕެކްސްގެ ޕެއާ އެވެ. މިގޭމުގައި ފުރަތަމަ ސެޓް 17-21 ގެ ނަތީޖާއަކުން ޓީމު އެޕެކްސް ކާމިޔާބުކުރިއިރު ދެވަނަ ސެޓް އެޓީމުން ކާމިޔާބުކުރީ 14-21 ގެ ނަތީޖާއަކުން ނެވެ.

މިއާއެކު މެޗުގެ ބާކީ އޮތް ވުމެންސް ޑަބަލްސް ގޭމާއި މިކްްސް ޑަބަލްސް ގޭމު ހަވަރު ސްޕޯޓްސް ކުލަބުން ނުކުޅެ ދޫކޮށްލުމުން ޓީމު އެޕެކްސް މެޗުން މޮޅުވީ 3-0 ގެ ނަތީޖާއަކުންނެވެ.

ޑިސެންބަރު 20 އިން 22 އަށް ކުރިއަށް ގެންދިއުމަށް ހަމަޖެހިފައިވާ މިމުބާރާތުގައި ޖުމްލަ ހަތަރު ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންގޮސްފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދި ދެޓީމު ފައިނަލަށް ހޮވޭގޮތަށެވެ.

މީގެ އިތުރުން މިމުބާރާތުގެ ޗެމްޕިއަން ޓީމަށް 25،000 އަދި ރަނަރަޕް ޓީމަށް 15,000 ރުފިޔާގެ ފައިސާގެ އިނާމެއް ކަޑައަޅާފައިވާއިރު، މުބާރާތުގައި ބައިވެރިވެފައިވާ ހަތަރު ޓީމުންކުރެ ކޮންމެ ޓީމަކަށް 2000 ރުފިޔާގެ ފައިސާގެ އިނާމެއް ހުވަދޫ ބެޑްމިންޓަން ކުލަބުން ވަނީ ދީފައެވެ.

މިމުބާރާތުގެ ޑިޖިޓަލް ޕާޓްނަރަކަށް އުރިދޫ މޯލްޑިވްސް ހަމަޖައްސާފައިވާއިރު، ބޭންކިންގް ޕާޓްނަރަކީ ބޭންކް އޮފް މޯލްޑިވްސް އެވެ. އަދި މެޑިކަލް ޕާޓްނަރަކަށް އަބްދުއްސަމަދު މެމޯރިއަލް ހޮސްޕިޓަލް ހަމަޖައްސާފައިވާއިރު، ބޭވަރެޖް ޕާޓްބަރުންނަކީ ހަތްތަރި ކެފޭ އަދި ޒިމަމަން ރެސްޓޯރެންޓެވެ. މީގެ އިތުރުން މުބާރާތުގެ ޓަރަވަލް ޕާޓްނާއަކަށް ވިލާ އެއަރ ހަމަޖައްސާފައިވާއިރު، މިމުބާރާތުގެ މީޑިއާ ޕާޓްނަރަކީ ގާފު ސްޕޯޓްސް އެވެ.