އަލިފާނުގެ ހާދިސާގެ ތަހުގީގަށް އިންޑީއާގެ ޓީމެއް ރާއްޖެއަށް!

މިމަހުގެ 12 ވަނަ ދުވަހު ސަރުކާރުގެ ތިން މިނިސްޓްރީއެއް ހިންގަމުން ދިޔަ އިމާރާތްތަކުގެ ހިނގި އަލިފާނުގެ ބޮޑު ހާދިސާގެ ތަހުގީގަށް އިންޑިއާގެ ޚާއްސަ ޓީމެއް ރާއްޖެ އަތުވެއްޖެ އެވެ.

މިކަން ހާމަކޮށް ފުލުހުންގެ ކޮމިޝަނަރ އަލީ ޝުޖާއު ވިދާޅުވީ މި މަހުގެ 12 ވަނަ ދުވަހު މ. ގްރީން ބިލްޑިންގގައި ހިނގި އަލިފާނުގެ ހާދިސާއާ ގުޅިގެން ކުރެވެމުންދާ ތަހުގީގުގައި، އިންޑިއާގެ ތަޖުރިބާކާރުންގެ ހާއްސަ ޓީމެއް މިހާރު ދަނީ ދިވެހި ފުލުހުންނާއެކު ހަރަކާތްތެރިވަމުން ކަމަށެވެ. ނަމަވެސް އެއީ އިންޑިއާގެ ކޮން އިދާރާއެއްގެ ބައެއް ކަމެއް ކޮމިޝަނަރުވެސް އަދި ފުލުހުންވެސް މިހާތަނަށް ހާމަކޮށްފައެއް ނުވެއެވެ.

އަލިފާނުގެ ހާދިސާ އާއި ގުޅިގެން ބޭރުގެ ބައެއްގެ އެހީ ހޯދާނެކަން ކޮމިޝަނަރ ހާމަކުރެއްވީ އަލިފާނުގެ ހާދިސާއަށްފަހު އޭގެ ދެދުވަސްފަހުން ބޭއްވި ނޫސްވެރިންގެ ބައްދަލުވުމެއްގައި އެވެ. އެގޮތުން އޭރު ކޮމިޝަނަރ ވިދާޅުވީ އެކަމާއި ގުޅިގެން ސަރުކާރުގެ އިދާރާތަކާއި އެކު ކުރަން ޖެހޭ މަސައްކަތްތައް ފުރިހަމަ ކުރެވި ދެތިން ދުވަހުގެ ތެރޭގައި އެޓީމުން ތަހުގީގާއި ގުޅޭނެ ކަމަށެވެ.

މިމަހުގެ 12 ވީ ބުރާސްފަތި ދުވަހުގެ ހެނދުނު 6:15 ހާއިރު ފުރަތަމަ އަލިފާން ރޯވީ ހައުސިންގ މިނިސްޓްރީ އާއި ކޮންސްޓްރަކްޝަން މިނިސްޓްރީ ހިންގަމުން ދިޔަ ޓިނު ބިލްޑިންގ ގައި އެވެ. އަދި އަލިފާންގަނޑު އިތުރަށް ފެތުރި އެ އިމާރާތް ޖެހިގެން ހުރި އެންވަރަމެންޓު މިނިސްޓްރީ ހިންގަމުން ދިޔަ ގްރީން ބިލްޑީންގ ގައި ވެސް އަލިފާން ރޯވި އެވެ.

އަލިފާން އެއްކޮށް ކޮންޓްރޯލް ކުރެވުނު އިރު ތިން މިނިސްޓްރީގެ މަސައްކަތްކުރަމުން ދިޔަ އޮފީސްތައް ވެސް ބޭނުން ކުރެވޭ ވަރަށް ވުރެ ބޮޑަށް ގެއްލުން ވެފައި އެވެ. އަދި އޮފީސްތަކުގައި ހުރި ގިނަ ސާމަނުތައްވެސް ވަނީ އަނދާފައި އެވެ.