ހައުސިންގ މިނިސްްޓްރީގައި ހިނގި އަލިފާނުގެ ހާދިސާ: %90 މިހާރު ވަނީ ކޮންޓްރޯލް ކުރެވިފައި!

މިއަދު ހައުސިންގ މިނިސްޓްރީ ހުންނަ ކޮށީގައި ރޯވި ބޮޑު އަލިފާންގަނޑުގެ 90 އިންސައްތަ މިހާރު ކޮންޓްރޯލް ކުރެވިފައިވާ ކަމަށް ސިފައިން ބުނެފި އެވެ.

އިމާރާތްކުރުމާއި ބިނާރާ ބެހޭ ވުޒާރާ ހިންގަމުންއަންނަ އިމާރާތުގައި އަލިފާނުގެ ހާދިސާއެއް ހިނގައިގެން އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ހަރަކާތްތެރިވާން ފެށީ މިއަދު ހެނދުނު 6:27 ހާއިރު އެވެ.

ސިފައިން ދާދި ދެންމެ އަކު ބުނީ އިމާރާތްކުރުމާއި ބިނާރާ ބެހޭ ވުޒާރާ އިމާރާތުގައި ރޯވެފައިވާ އަލިފާނުގެ %90 މިހާރު ކޮންޓްރޯލް ކުރެވިފައިވާ ކަމަށެވެ. ނަމަވެސް އަލިފާން ރޯވި އިމާރާތްތަކަށް ބޮޑެތު ގެއްލުންތަކެއް ވަނީ ލިބިފައި އެވެ.

އަދި އަލިފާން އެއްކޮށް ނިއްވާލުވުމަށް ވީއައިއޭގެ ފަޔާފައިޓަރުންނާއި އެމްޕީއެލްގެ މުވައްޒަފުންވެސް ވަނީ ސިފައިންނާއި އެކު މަސައްކަތްކުރަމުންނެވެ.

އަލިފާނުގެ ހާދިސާއާއި ގުޅިގެން އެ ސަރަހައްދުގެ ގޭގެއަށްވެސް ވަރަށް ބޮޑަށް ދުމުގެ އަސަރުކޮށްފައިވާއިރު ފުލުހުންނާއި ކަމާއި ގުޅުން ހުރި އިދާރާތައް ގުޅިގެން އިމާރާތްތަކުން މީހުން ހުސްކުރުމުގެ މަސައްކަތް އަންނަނީ ކުރަމުންނެވެ. އަދި ވަގުތީ ހިޔާއެއް މިހާރު ސޯޝަލް ސެންޓަރުގައި ވަނީ ގާއިމްކޮށްފައެވެ.