އަލިފާނުގެ ހާދިސާއާއި ގުޅިގެން މަސްވެރިންގެ ދުވަހުގެ ޖަލްސާ ފަސްކޮށްފި

މިއަދު މާލޭގައި ހިނގި އަލިފާނުގެ ބޮޑު ހާދިސާއާއި ގުޅިގެން މާދަމާ ރޭ ބޭއްވުމަށް ތާވަލުކުރި މަސްވެރިންގެ ދުވަހުގެ ރަސްމީ ޖަލްސާ ފަސްކޮށްފި އެވެ.

މާލޭގައި މިއަދު ހެނދުނު އަލިފާނުގެ ހާދިސާއެއް ހިނގީ އަމީނީމަގުން މާފަންނުގައި ހުންނަ ހައުސިންގ މިނިސްޓްރީ ހިންގަމުން ދިޔަ އިމާރާތުގައި އެވެ. މި އަލިފާންގަނޑު ކޮންޓްރޯލް ނުކުރެވި ކޮންސްޓްރަކްޝަން މިނިސްޓްރީއާއި އެންވަރަމެންޓު މިނިސްްޓްރީ ހިންގަމުން ދިޔަ އިމާރާތްތަކަށްވެސް އެލިފާންގަނޑު ފެތުރި އެއޮފީސްތައް ވަނީ ބޭނުންނުކުރެވޭ ވަރަށް އަނދާފައެވެ.

މި ހާދިސާއި ގުޅިގެން އެތިން މިނިސްޓްރީގެ ހިދުމަތްތައް ވަގުތީ ގޮތުން މެދުކަނޑާލާފައިވާއިރު އެމިނިސްޓްރީ ތަކުގެ ހިދުމަތްތައް ފެށޭނެ ސީދާ ތާރީހެއް އަދި ސަރުކާރުން ހާމައެއް ނުކުރެއެވެ.

މިރޭ ފިޝަރީޒް މިނިސްޓްރީން ނެރުނު ބަޔާނެއްގައި ބުނީ މިއަދު ހިނގައިދިޔަ ހިތާމަވެރި އަލިފާނުގެ ހާދިސާއާ ގުޅިގެން 44ވަނަ މަސްވެރިންގެ ދުވަހުގެ މުނާސަބަތުގައި މާދަމާރޭ ދަރުބާރުގޭގައި ބޭއްވުމަށް ހަމަޖެހިފައިވާ ރަސްމީ ހަފުލާ ފަސްކޮށްފައިވާ ކަމަށެވެ. ހަފުލާއަށް ދައުވަތު އަރުވައިފައިވާ ފަރާތްތަކަށް ހަފުލާ ބާއްވާނެ ދުވަހެއް ފަހުން ހިއްސާކުރާނެ ކަމަށް އެ މިނިސްޓްރީން ބުނެފައިވެއެވެ.

މިއަދުގެ ހާދިސާއާއި ގުޅިގެން އަދި މިހާތަނަށް ސަރުކާރުން ރަސްމީ ބަހެއް ބުނެފައި ނުވާއިރު ގެއްލުން ލިބުނު މިނިސްޓްރީތަކަށް ލިބުނު ގެއްލުންތަކުގެ އެސެސްމެންޓުތަކެއް މިހާރު ދަނީ ހަދަމުންނެވެ.

މިއަދުގެ މި ހާދިސާގެ ރިޕޯޓު ސިފައިންނަށް ލިބުނީ މިއަދު 06:27 ހާއިރު އެވެ. އެވަގުތުން ފެށިގެން އަލިފާން ނިއްވުމަށް ސިފައިން މަސައްކަތްކުރަމުން ދިޔައިރު އަލިފާންގަނޑު އެއްކޮށް ކޮންޓްރޯލްކުރެވުނީ މިއަދުގެ މެންދުރު ފަހުގެ ވަގުތެއްގައި އެވެ.

މި ހާދިސާގައި ހާލުގައި ޖެހުނު 7 ގޭބިސީއެއްގެ 29 މީހަކަށް ނެޝަނަލް ޑިޒާސްޓަރ މެނޭޖެންމެންޓުން ދަނީ އެހީތެރިކަން ފޯރުކޮށްދެމުންނެވެ.