މާފަންނުގެ ބިޔަ ބޮޑު އަލިފާން : އަސަރުކުރި 7 ގޭބިސީއެއްގެ މީހުން ވަގުތީ ހިޔާތަކަށް!

ހައުސިންގ މިނިސްޓްރީ ހުންނަ ކޮށީގައި މިއަދު ހިނގި އަލިފާނުގެ ބޮޑު ހާދިސާގެ އަސަރުކުރި 7 ގޭބިސީއެއްގެ މީހުން ވަގުތީ ހިޔާތަކަށް ބަދަލުކުރަމުންދާކަމަށް ނެޝަނަލް ޑިޒާސްޓަރ މެނޭޖްމެންޓު އޮތޯރިޓީއިން ބުނެފި އެވެ.

އެންޑީއެމްއޭއީއިން މިރޭ އެކްސްގައި ކުރި ޕޯސްޓެއްގައި ބުނީ އަލިފާނުގެ ހާދިސާ ހިނގި ސަރަހައްދުގައި ހުރި 3 އިމާރާތެއްގެ 7 ގޭބީސީއަކުން 29 މީހުން ވަގުތީ ހިޔާތަކަށް ބަދަލުކުރުމުގެ މަސައްކަތް މިވަގުތު ކުރަމުންދާ ކަމަށެވެ. އެގޮތުން އެއީ 15 ފިރިހެނުންނާއި 14 އަންހެނުން ކަމަށަެވެ.

މީގެ ތެރޭގައި ސިއްޚީ ހާއްސަ އެހީތެރިކަން ބޭނުންވާ ފަރާތެއްވެސް ހިމެނޭ ކަމަށް އެއޮތީރިޓީން ބުނެއެވެ.

މި މީހުންނަކީ އަލިފާނުގެ ހާދިސާ ހިނގި ހައުސިންގ މިނިސްޓްރީ އިމާރާތުގެ ކުރިމައްޗަށް ހުންނަ މ.ލޯކަށިގެ، މ.ކުދިމާވިލާ އަދި މ.ލޫބިޔާ ގެ އެކި ފަންގިލާތަކުގައި ދިރިއުޅޭ އަދި އަލިފާނުގެ ހާދިސާގައި ގޭގައި މިވަގުތު ނޫޅެވޭ ވަރަށް ގެއަށް ދުމުގެ އަސަރުކޮށްފައިވާ ގެތަކުގެ މީހުން ކަމަށް މައުލޫމާތު ލިބެއެވެ.

އެންޑީއެމްއޭއިން އިތުރަށް ބުނީ އަލިފާނުގެ ހާދިސާއާއި ގުޅިގެން ފެނާއި ކަރަންޓު ކެނޑިފައިވާ އިމާރާތްތަކަށް ފެނާއި ކަރަންޓު އަލުން ގުޅުއިދިނުމުގެ ޚިދުމަތް ސްޓެލްކޯއާއި އެމްޑަބްލިއުއެސްސީ ގުޅިގެން ކުރަމުން އަންނަ ކަމަށެވެ.

އިމާރާތްކުރުމާއި ބިނާރާ ބެހޭ ވުޒާރާ ހިންގަމުންއަންނަ އިމާރާތުގައި އަލިފާނުގެ ހާދިސާއެއް ހިނގައިގެން އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ހަރަކާތްތެރިވާން ފެށީ މިއަދު ހެނދުނު 6:27 ހާއިރު އެވެ. މި އަލިފާންގަނޑު އެއްކޮށް ކޮންޓްރޯލް ކުރެވޭ ވަރުވީ މިއަދުގެ މެންދުރު އެވެ.