ރަޝިޔާ އަސްކަރިއްޔާގެ އިސް ޖެނެރަލަކު އަވަހާރަކޮށްލައިފި: ޒިންމާ ނެގީ ޔޫކްރެއިނުން!

ޔޫކްރެއިނު އަސްކަރިއްޔާއިން ހިންގި ޚާއްސަ އޮޕަރޭޝަނެއްގައި ރަޝިޔާ އަސްކަރިއްޔާގެ އިސް ޖެނެރަލަކު އަވަހާރަކޮށްލައިފި އެވެ.

ރަޝިޔާގެ ވެރިރަށް މޮސްކޯގެ އިލެކްޓްރިކް ސްކޫޓަރެއްގައި ފޮރުވާފައި އޮތް ބޮމެއް ގޮއްވާލައިގެން ދިން ހަމަލާއެއްގައި ރަޝިޔާގެ ނިއުކްލިއާ ޕްރޮޓެކްޝަން ފޯސް ހިންގުމާ ހަވާލުވެ ހުންނެވި އިސް ޖެނެރަލަކާއި އެހީތެރިއަކު މަރުވެފައިވާ ކަމަށް ރަޝިއާގެ ތަހުގީގީ ކޮމިޓީން މިއަދު ވަނީ އިއުލާނުކޮށްފައެވެ.

ރިޕޯޓުތައް ބުނާގޮތުގައި ޓްރޫޕްސް އޮފް ރޭޑިއޮލޮޖިކަލް، ކެމިކަލް އެންޑް ބަޔޮލޮޖިކަލް ޑިފެންސްގެ ޗީފްގެ މަގާމުގައި ހުންނެވި ލެފްޓިނެންޓް ޖެނެރަލް އިގޯރް ކިރިލޯވް އަވަހާރަކޮށްލާފައިވަނީ އޭނާ ދިރިއުޅޭ އެޕާޓްމަންޓް އިމާރާތުގެ ބޭރުގައި ދިން ހަމަލާގައި އެވެ.

ލެފްޓިނެންޓް ޖެނެރަލް އިގޯރް ކިރިލޯވް އަވަހާރަކޮށްލީ ޔޫކްރެއިންގެ އެސްބީޔޫ ސެކިއުރިޓީ ސާވިސްއިން ހިންގި ހާއްސަ އޮޕަރޭޝަނެއް ކަމަށް ޔޫކްރެއިންގެ މަސްދަރަކުން ރޮއިޓާސް އާއި އޭއެފްޕީ ނިއުސް އެޖެންސީތަކަށް މައުލޫމާތުދީފައި ވެއެވެ. ނަމަވެސް ޔޫކްރެއިން ސަރުކާރުން މިކަމާއި ގުޅިގެން އަދި ރަސްމީކޮށް އެއްޗެއް ބުނެފައެއް ނުވެއެވެ.

ރޮއިޓާސް އާއި އޭއެފްޕީއާ ހަވާލާދީ އެސްބީޔޫގެ މަސްދަރަކުން ބުނީ ޖެނެރަލް މަރާލުމުގެ ފަހަތުގައި ވަނީ އެ އެޖެންސީ ކަމަށާއި އޭނާ އަކީ "ސައްހަ ޓާގެޓެއް" ކަމަށެވެ.

ޔޫކްރެއިންގެ އޮފިޝަލުން ކިރިލޯވް އަކީ ހަނގުރާމައިގެ ކުށްވެރިއެއްގެ ގޮތުގައި ދެކޭ އިރު، އޭނާ ހަނގުރާމައިގައި ޔޫކްރެއިން ސިފައިންނާ ދެކޮޅަށް މަނާ ކެމިކަލް ހަތިޔާރު ބޭނުންކުރަން އަމުރުކުރި ކަމަށް ޔޫކްރެއިނުން ތުހުމަތު ކުރެ އެވެ.

އަވަހާރަކޮށްލި އުމުރުން 54 އަހަރުގެ ކިރިލޯވް ރަޝިޔާގެ ޓްރޫޕްސް އޮފް ރޭޑިއޮލޮޖިކަލް، ކެމިކަލް އެންޑް ބަޔޮލޮޖިކަލް ޑިފެންސްގެ ޗީފްގެ މަގާމާއި ހަވާލުވެވަޑައިގެންނެވީ 2017 ވަނަ އަހަރު އެވެ.

އޭނާ އަކީ ޔޫކްރެއިންގައި ބޭނުންކުރާ އެންމެ އަނިޔާވެރި އެއް ހަތިޔާރު ކަމަށްވާ ޓީއޯއެސް-2 ހެވީ ތަރމޯބަރިކް ސިސްޓަމް އުފެއްދުމުގައި ބައިވެރިވި ބޭފުޅެކެވެ.

މި ހަމަލާއަކީ ރަޝިޔާ ފަސްގަނޑުގައި ރަޝިޔާގެ މިފަދަ އިސް ޖެނެރަލަކު އަވާހަރަކޮށްލި ފުރަތަމަ ހަމަލާއެވެ.