15 އަހަރުންދަށް އަންހެން: ފަހު މިނެޓުގައި ކާމިޔާބުކުރި ދެލަނޑާއެކު ރެހެންދި ސްކޫލް ބަލިކޮށް ގުރައިދޫ ޗެންޕިއަންކަން ހޯދައިފި

މިހާރު ކުރިއަށްދާ 7ވަނަ އިންޓަރ ސްކޫލް ހޭންޑްބޯޅަ މުބާރާތުގެ 15 އަހަރުންދަށުގެ އަންހެން ފައިނަލް މެޗުގައި ވާދަވެރި ކުޅުމަކަށްފަހު 10-9 ގެ ނަތީޖާއަކުން ރެހެންދި ސްކޫލް ބަލިކޮށް ގުރައިދޫ ސްކޫލް މުބާރާތުގެ ޗެންޕިއަންކަން ހޯފައިފިއެވެ.

ގުރައިދޫ ސްކޫލް މުބާރާތުގެ ފައިނަލުން ޖާގަހޯދީ ސެމީފައިނަލުގެ ފުރަތަމަ މެޗުގައި ވާދަވެރި ކުޅުމަކަށްފަހު 6-7 ގެ ނަތީޖާއަކުން އަހުމަދިއްޔާ އިންޓަނޭޝަނަލް ސްކޫލް ބަލިކުރުމަށްފަހު އެވެ. އަދި ރެހެންދި ސްކޫލް ފައިނަލުން ޖާގަހޯދީ ސެމީފައިނަލުގެ ދެވަނަ މެޗުގައި 7-11 ގެ ނަތީޖާއަކުން ހަމަދު ސްކޫލް ބަލިކުރުމަށްފަހުއެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 3-3 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި މެޗުގެ ދެވަނަ ހާފުގައި ވެސް ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މެޗުގެ އެންމެ ފަހު މިނެޓާއި ހަމައަށް 8-9 ގެ ނަތީޖާއަކުން ލީޑުކުރަމުންދިޔައީ ރެހެންދި ސްކޫލުންނެވެ. ނަމަވެސް މެޗުގެ އެންމެ ފަހު މިނެޓުގައި ކާމިޔާބުކުރި ދެ ލަނޑާއެކު ގުރައިދޫ ސްކޫލުން ވަނީ 10-9 ގެ ނަތީޖާއަކުން ކުރިހޯދާފައެވެ.

އެގޮތުން މިމެޗުގައި ގުރައިދޫ ސްކޫލްގެ މަރިޔަމް ރީމް ތައުރީފް ފަސް ލަނޑު ކަމިޔާބުކުރިއިރު، އެޓީމުގެ ހިންދު އަހުމަދު ސާމިއު ވަނީ ދެލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ ލަމްއާ އިބްރާހިމް މުއާޒް އަދި ޔަމްނާ އަހުމަދު ޔާސިރު މިއިން ކޮޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ރެހެންދި ސްކޫލްގެ އާމިނަތު އީޝަލް މުސާ އަދި އިފްޝާ މުހައްމަދު ފިރާގް މިއިން ކޮންމެ ކުޅުންތެރިއަކު ތިން ލަނޑު ކާމިޔާބުކުރިއިރު، އެޓީމުގެ މަރިޔަމް އަރީން އާރިފް ވަނީ ދެލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑު ނާޔާ ބިންތް އިބުރާހިމް ނައުފަލް ކާމިޔާބުޖުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ ގުރައިދޫ ސްކޫލްގެ މަރިޔަމް ރީމް ތައުރީފް އެވެ.

މިއަހަރުގެ އިންޓަރ ސްކޫލް ހޭންޑްބޯޅަ މުބާރާތުގެ 15 އަހަރުން ދަށުގެ އަންހެން ޑިވިޝަނުގައި ޖުމްލަ 20 ޓީމަކުން ވާދަކޮށްފައިވާއިރު، މިޑިވިޝަންގެ މެޗުތައް ކުރިއަށް ގެންގޮސްފައިވަނީ ބައިވެރިވި 20 ޓީމު ފަސް ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެއްވަނަ ހޯދާ ޓީމުގެ އިތުރުން، ފަސް ގުރޫޕުން ދެވަނަ ހޯދި ޓީމުތަކުގެ ތެރެއިން އެންމެ ނަތީޖާ ރަނގަޅު ތިން ޓީމަށް ވެސް މުބާރާތުގެ ކުއާޓާ ފައިނަކުން ވަނީ ފުރުސަތު ލިބިފައެވެ.