"ހުޅަނގު ބީޗު ހޭންޑްބޯޅަ 2025" ގެ ނަމުގައި ވެސްޓް އެންޑް ސްޕޯޓްސް ކުލަބުން ބީޗު ހޭންޑްބޯޅަ މުބާރާތެއް ބާއްވަނީ

ވެސްޓް އެންޑް ސްޕޯޓްސް ކުލަބާއި ހޭންޑްބޯޅަ މޯލްޑިވްސް ގުޅިގެން "ހުޅަނގު ބީޗު ހޭންޑްބޯޅަ މުބާރާތް 2025" ގެ ނަމުގައި ބީޗު ހޭންޑްބޯޅަ މުބާރާތެއް ބާއްވަން ނިންމައިފިއެވެ.

މުބާރާތް އިންތިޒާމްކުރާ ފާރާތުން އޮފިޝަލަކު ގާފު ސްޕޯޓްސްއަށް މައުލޫމާތުދިން ގޮތުގައި 2025 ޖެނުއަރީ 31 ގައި ފެށުމަށް ހަމަޖެހިފައިވާ މިމުބާރާތް ކުރިއަށް ގެންދިއުމަށް ހަމަޖެހިފައިވަނީ ހުޅުމާލޭ ފޭސް 2 ގައެވެ. އަދި ދެ ޑިވިޝަނަކަށް ބަހާލައިގެން ކުރިއަށް ގެންދާ މިމުބާރާތުގައި އަންހެން އަދި ފިރިހެން ކޮންމެ ޑިވިޝަނަކުން ވެސް 16 ޓީމަށް ފުރުސަތު ދިނުމަށް ވަނީ ހަމަޖެހިފައެވެ.

މުބާރާތުގައި ބައިވެރިވުމުގެ ފުރުސަތު 1 ޖެނުއަރީ 2025 ގައި ހުޅުވާލުމަށް ހަމަޖެހިފައިވާއިރު، ކޮންމެ ޑިވިޝަނަކުން ވެސް އެންމެ ފުރަތަމަ ބައިވެރިވުމަށް އެދި ހުށަހަޅާ 16 ޓީމަށް މުބާރާތުގައި ބައިވެރިވުމުގެ ފުރުސަތު ދިނުމަށް ވަނީ ހަމަޖެހިފައެވެ. އަދި މުބާރާތުގެ ދެޑިވިޝަނުގެ މެޗުތައް ވެސް ކުރިއަށް ގެންދިއުމަށް ހަމަޖެހިފައިވަނީ 16 ޓީމު ހަތަރު ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެ ޓީމު މުބާރާތުގެ ކުއާޓާ ފައިނަލަށް ހޮވޭގޮތަށެވެ.

މުބާރާތުގައި ބައިވެރިވާ ކޮންމެ ޓީމެއްގެ އަތުން ބައިވެރިވުމުގެ ފީއެއްގެ ގޮތުގައި 1000 ރުފިޔާ ނެގުމަށް ހަމަޖެހިފައިވާއިރު، މުބާރާތުގެ އަންހެން އަދި ފިރިހެން ޑިވިޝަނެއްގެ ޗެންޕިއަން ޓީމަށް 7500 ރުފިޔާގެ އިތުރުން ޗެންޕިއަން ޓްރޮފީ އަދި ރަނަރަޕް ޓީމަށް 5000 ރުފިޔާގެ ފައިސާގެ އިނާމެއް ދިނުމަށް ހަމަޖެހިފައިވެއެވެ.

މީގެ އިތުރުން މުބާރާތުގެ އަންހެން އަދި ފިރިހެން ޑްރީމް ޓީމު (ކޮންމެ ޑިވިޝަނަކުން ވެސް އެންމެ މޮޅު ހަތަރު ކުޅުންތެރިން) ހޮވުމުގެ އިތުރުން މުޅި މުބާރާތުން އެންމެ މޮޅު އަންހެން އަދި އެންމެ ފިރިހެން ކުޅުންތެރިޔާ ގެމަގާމާއި އެންމެ ފާހަގަކޮށްލެވޭ ސަޕޯޓަރުންގެ ޓީމުގެ އިތުރުން ދެޑިވިޝަނުގެ އެންމެ އުންމީދީ ކުޅުންތެރިޔާގެ މަގާމު ހޮވުމަށް ވެސް ވަނީ ހަމަޖެހިފައެވެ.

މިމުބާރާތް އިންތިޒާމްކުރާ ވެސްޓް އެންޑް ސްޕޯޓްސް ކުލަބަކީ ކުޅިވަރުގެ ދާއިރާއިން ޒުވާނުން ބާރުވެރިކޮށް ވާދަވެރި މާހައުކެއްގައި ޒުވާނުންނަށް ފަހި ފުރުސަތުތަކެއް ހޯދައިދިނުމަށް މަސައްކަތް ކުރަމުން އަންނަ ކުލަބު ޖަމްއިޔާއެކެވެ. އެގޮތުން މިދިޔަ ނޮވެންބަރު މަހު އެކުލަބުން ވަނީ ހުޅުމާލޭގައި ވަރަށް ކާމިޔާބު ފުޓްސަލް މުބާރާތެއް ވެސް ބާއްވާފައެވެ.