17 އަހަރުންދަށް ފިރިހެން: ވާދަވެރި ކުޅުމަކަށްފަހު ތާޖުއްދީން ބަލިކޮށް ޖަމާލުއްދީން ފައިނަލުން ޖާގަ ހޯދައިފި

މިހާރު ކުރިއަށްދާ 7ވަނަ އިންޓަރ ސްކޫލް ހޭންޑްބޯޅަ މުބާރާތުގެ 17 އަހަރުންދަށުގެ ފިރިހެން ސެމީ ފައިނަލް ފުރަތަމަ މެޗުގައި ޖަމާލުއްދީން ސްކޫލާއި ތާޖުއްދީން ސްކޫލް ކުޅުނު މެޗު ވާދަވެރި ކުޅުމަކަށްފަހު 20-21 ގެ ނަތީޖާއަކުން ކާމިޔާބުކޮށް ޖަމާލުއްދީ ސްކޫލް މުބާރާތުގެ ފައިނަލުން ޖާގަ ހޯދައިފިއެވެ.

ޖަމާލުއްދީން ސްކޫލް މުބާރާތުގެ ސެމީ ފައިނަލުން ޖާގަ ހޯދީ ކުއާޓާ ފައިނަލް ފުރަތަމަ މެޗުގައި 23-18 ގެ ނަތީޖާއަކުން ބްރައިޓްވޭ އިންޓްނޭޝަނަލް ސްކޫލް ބަލިކުރުމަށްފަހު އެވެ. އަދި ތާޖުއްދީން ސްކޫލް ސެމީ ފައިނަލުން ޖާގަހޯދީ ކުއާޓާ ފައިނަލް ތިންވަނަ މެޗުގައި 12-17 ގެ ނަތީޖާއަކުން އަރަބިއްޔާ ސްކޫލް ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ފޯރިގަދަ އަވަސް ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 10-10 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި މެޗުގެ ދެވަނަ ހާފުގައި ވެސް ދެޓީމުގެ ފަރާތުން ވަނީ ވަރަށް ވާދަވެރި ކުޅުމެއް ފެނިގެންގޮސްފައެވެ.

އެގޮތުން ދެވަނަ ހާފުގައި ޖަމާލުއްދީން ސްކޫލުން ވަނީ އިތުރު 11 ލަނޑު ކާމިޔާބުކުރިއިރު، މިހާފުގައި ތާޖުއްދީން ސްކޫލުން ވެސް ވަނީ އިތުރު 10 ލަނޑު ކާމިޔާބުކޮށްފައެވެ. އަދި މެޗުގެ ނަތީޖާ އެއްވަކުރުމަށް އެންމެ ފަހު ސިކުންތުކޮޅުގެ ތެރޭގައި އެޓީމަށް ޕެނަލްޓީއެއް ވެސް ލިބުނެވެ.

ނަމަވެސް ތާޖުއްދީން ސްކޫލަށް ލިބުނު ޕެނަލްޓީ ނާކާމިޔާބުވެ މެޗުގެ ކުޅުން ނިމިގެންދިޔައީ 20-21 ގެ ނަތީޖާއަކުން ޖަމާލުއްދީން ސްކޫލް ކުރީގައި އޮވެގެންނެވެ.

މިމެޗުގައި ޖަމާލުއްދީން ސްކޫލްގެ މުހައްމަދު އަފްލާހު ހުސެއިން ޝިފާޒް ހަތް ލަނޑު ކާމިޔާބުކުރިއިރު، އެޓީމުގެ އަލްހާން ފައިސަލް އަމީން ވަނީ ފަސް ލަނޑު ކާމިޔާބުކޮށްފައެވެ.އަދި މީގެ އިތުރުން އެޓީމުގެ އިނާން ތޮލްއަތު މުހައްމަދު އަދި ޔޫސުފް މާއިޝް މުސްތަފާ މިއިން ކޮންމެ ކުޅުންތެރިއަކު ތިން ލަނޑު އަދި އެޓީމުގެ ޔޫނުސް ވާޒިން މުހައްމަދު ވިޝާމް ވަނީ ދެ ލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑު ކާމިޔާބުކޮށްދިނީ އައުފް އަބްދުއް ރަހުމާން އާރިފް އެވެ.

މީގެ އިތުރުން މިމެޗުގައި ތާޖުއްދީން ސްކޫލްގެ އުމޭރު މުހައްމަދު މުއިޒް ނުވަ ލަނޑު ކާމިޔާބުކުރިއިރު، އެޓީމުގެ ލޫތު ބިން ސައުދު ވަނީ ފަސް ލަނޑު ކާމިޔާބުކޮށްފައެވެ. އަދި މިގެ އިތުރުން އެޓީމުގެ އަލީ އަފްލާހް އަނީލް އަދި މުހައްމަދު ޝައިބާން އަބްދުއް ސައްތާރު މިއިން ކޮންމެ ކުޅުންތެރިއަކު، ދެލަނޑު އަދި އެޓީމުގެ އަހުމަދު ރަޝާން މުހައްމަދު އަދި ހާފިޒް ހުސެއިން މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޖަމާލުއްދީން ސްކޫލްގެ އިބްރާހިމް ޒައިން ޒިހާމް އެވެ.

މިއަހަރުގެ އިންޓަރ ސްކޫލް ހޭންޑްބޯޅަ މުބާރާތުގެ 17 އަހަރުން ދަށުގެ ފިރިހެން ޑިވިޝަނުގައި ޖުމްލަ 16 ޓީމަކުން ވާދަކޮށްފައިވާއިރު، މިޑިވިޝަންގެ މެޗުތައް ކުރިއަށް ގެންގޮސްފައިވަނީ ބައިވެރިވި 16 ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެ ޓީމަށް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.