މާލެ ސިޓީ ކައުންސިލްގެ އޮފީހެއްގައިވެސް ރޯވި: މާލޭގެ ރަށްވެހިންގެ މުހިންމު މައުލޫމާތުތަކެއް ގެއްލުން އެކަށީގެންވޭ!

މިއަދު ހައުސިންގ މިނިސްޓްރީ ހުންނަ ކޮށީގައި ރޯވި ބޮޑު އަލިފާންގަނޑުގައި އެސަރަހައްދުގައި ހުންނަ މާލެ ސިޓީ ކައުންސިލްގެ އޮފީހެއްގައިވެސް ރޯވެފައިވާ ކަމަށް މާލެ ސިޓީ ކައުންސިލުން ބުނެފި އެވެ.

ސިޓީ ކައުންސިލްގެ ޑެޕިއުޓީ މޭޔަރު, އަހުމަދު ނަރީޝް އެސަރަހައްދުގައި ހުންނަވައި ނޫސްވެރިންނަށް މައުލޫމާތު ދެއްވަމުން ވިދާޅުވީ އެސަރަހައްދުގައި ހުންނަ މާލޭ ސިޓީ ކައުންސިލްގެ ވައިޓަލް ރެޖިސްޓްރޭޝަންގެ އޮފީހުގައިވެސް ރޯވެފައިވާ ކަމަށެވެ. އަދި އަލިފާންގަނޑު މިހާރު ކޮންޓްރޯލް ކޮށްފައިވުމާއި އެކު އެއޮފީހުގައި ހުރި ބައެއް ތަކެތިވެސް ސަލާމާތްކުރުމުގެ މަސައްކަތުގައި އެކައުންސިލްގެ މުނިސިޕަލް މުވައްޒަފުންވެސް ހަރަކާތްތެރިވަމުންދާ ކަމަށް ނަރީޝް ވިދާޅުވިއެވެ.

ހައުސިންގ މިނިސްޓްރީގެ ފުރަގަހަށް ވާގޮތަށް ހުންނަ މާލެ ސިޓީ ކައުންސިލްގެ ވައިޓަލް ރެޖިސްޓްރޭޝަންގެ އޮފީހަކީ އުފަންވާ ކުދިން ރަޖިސްޓްރީކުރުމާއި އާބާދީއާ ބެހޭ މައުލޫމާތު ބަލަހައްޓާ ޑިޕާޓްމެންޓެކެވެ.

ނަރީޝް ވަނީ އެއޮފީހަށް ލިބުނު ގެއްލުމުގެ ސަބަބުން މާލޭ ރަށްވެހިންގެ މުހިންމު މައުލޫމާތުތަކެއް ގެއްލިފައިވުން އެކަށީގެންވާ ކަމަށް ވަނީ ބެލެވޭކަމަށް ވިދާޅުވެފައި އެވެ.

މި އަލިފާނުގެ ހާދިސާ އާއި ގުޅިގެން އަލިފާންގަނޑު އެއްކޮށް ނިއްވާލުމަށް ސިފައިންނާއި އެއާޕޯޓުގެ ފަޔާފައިޓަރުން ދަނީ ހުއްޓުމެއްނެތި މަސައްކަތް ކުރަމުންނެވެ. އަލިފާންގަނޑު މިހާރު ކޮންޓްރޯލް ކޮށްފައިވާއިރު އަލިފާންރޯވި އިމާރާތްތަކަށް ބޮޑެތި ގެއްލުންތަކެއް ވަނީ ލިބިފައި އެވެ.

އަލިފާނުގެ ހާދިސާއާއި ގުޅިގެން އެ ސަރަހައްދުގެ ގޭގެއަށްވެސް ވަރަށް ބޮޑަށް ދުމުގެ އަސަރުކޮށްފައިވާއިރު ފުލުހުންނާއި ކަމާއި ގުޅުން ހުރި އިދާރާތައް ގުޅިގެން އިމާރާތްތަކުން މީހުން ހުސްކުރުމުގެ މަސައްކަތް އަންނަނީ ކުރަމުންނެވެ. އަދި ވަގުތީ ހިޔާއެއް މިހާރު ސޯޝަލް ސެންޓަރުގައި ވަނީ ގާއިމްކޮށްފައެވެ.