logoEN
Sto top
ފަހަތުން އަރައި ޓޮޓެންހަމް ބަލިކޮށް ޗެލްސީ އިން ފަރަގު ކުޑަކޮށްފި

ފަހަތުން އަރައި ޓޮޓެންހަމް ބަލިކޮށް ޗެލްސީ އިން ފަރަގު ކުޑަކޮށްފި

ހަސަން ޝަމްއޫން

logo

12/9/2024, 4:39:23 AM

# ޓޮޓެންހަމް# އިނގިރޭސި ޕްރެމިއާ ލީގު# ޗެލްސީ# ބޭރު ދުނިޔޭގެ ކުޅިވަރު

ޗެލްސީ އާއި ޓޮޓެންހަމް ވާދަކުރި މެޗުގެ ތެރެއިން...

އިގިރޭސި ޕްރެމިއާ ލީގުގައި އާދިއްތަ ދުވަހުގެ ރޭ ރަށުން ބޭރުގައި 4-3 ގެ ނަތީޖާއަކުން ޓޮޓެންހަމް ބަލިކޮށް ޗެލްސީ އިން އެއްވަނައިގައި އޮތް ލިވަޕޫލް އާއި ދެމެދުގައިވާ ފަރަގު ހަތަރު ޕޮއިންޓަށް ކުޑަކޮށްފިއެވެ.

Wamco

ލީގުގައި ޗެލްސީ އެންމެ ފަހުން ކުޅުނު މެޗުގައި ސައުތުހެމްޓަން އަތުން 5-1 ގެ ނަތީޖާއަކުން މޮޅުވެފައިވާއިރު، ޓޮޓެންހަމް އެންމެ ފަހުން ކުޅުނު މެޗުގައި ބޯންމައުތު އަތުން 1-0 ގެ ނަތީޖާއަކުން އެޓީމު ވަނީ ބަލިވެފައެވެ. އަދި މިދެޓީމު އެންމެ ފަހުން ކުޅުނު މެޗު 2-0 ގެ ނަތީޖާއަކުން ކާމިޔާބުކުރީ ޗެލްސީ އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ޓޮޓެންހަމް އިންނެވެ. މިލަނޑު މެޗު ފެށިގެން ފަސްވަނަ މިނެޓްގައި ކާމިޔާބުކޮށްދިނީ ފޯވާޑް ޑޮމެނިކް ސޮލާންކޭ އެވެ. އަދި އޭގެ ހަ މިނެޓް ފަހުން އެޓީމުގެ ފޯވާޑް ކުލުސެސްކީ ވަނީ އިތުރު ލަނޑެއް ކާމިޔާބުކޮށް ލީޑު ފުޅާކޮށްފައެވެ.

ޗެލްސީ އިން ނަތީޖާގެ ފަރަގު ކުޑަކުރި ލަނޑު މެޗުގެ 17 ވަނަ މިނެޓުގައި ކާމިޔާބުކޮށްދިނީ ޖޭޑަން ސަންޗޯ އެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން ޓޮޓެންހަމް ކުރީގައި އޮވެގެންނެވެ.

މެޗުގެ ދެވަނަ ހާފުގައި ޗެލްސީ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިހާފުގައި އެޓީމުން އިތުރު ތިން ލަނޑު ކާމިޔާބުކުރިއިރު، ޓޮޓެންހަމް އިން ވެސް ވަނީ އިތުރު އެއްލަނޑު ކާމިޔާބުކޮށްފައެވެ.

އެގޮތުން މިހާފުގައި ޗެލްސީގެ ކޯލް ޕާމާ ދެލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ އެންޒޯ ފެނާންޑޭޒް އެވެ. އަދި މިމެޗުގައި ޕާމާ ކާމިޔާބުކުރި ދެ ލަނޑަކީ ވެސް އެޓީމަށް ލިބުނު ދެ ޕެނަލްޓީގައި އޭނާ ކާމިޔާބުކުރި ދެ ލަނޑެވެ.

މީގެ އިތުރުން މެޗުގެ އިތުރުވަގުތުގެ ތެރޭގައި ޓޮޓެންހަމްގެ ތިންވަނަ ލަނޑު ކާމިޔާބުކޮށްދިނީ އެޓީމުގެ ކެޕްޓަން ހިއުން މިން ސޮން އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 4-3 ގެ ނަތީޖާއަކުން ޗެލްސީ ކުރީގައި އޮވެގެންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޗެލްސީގެ ކޯލް ޕާމާ އެވެ.

މިނަތީޖާއެކު ލީގުގައި ކުޅުނު 15 މެޗުން ޗެލްސީއަށް 31 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގުތާވަލުގެ ދެވަނައިގައެވެ. އަދި އެއްވަނައިގައި އޮތް ލިވަޕޫލަށް 14 މެޗުން 35 ޕޮއިންޓް ލިބިފައިވާއިރު. މިމެޗުން ބަލިވި ޓޮޓެންހަމް ލީގުގައި ކުޅުނު 15 މެޗުން ލިބުނު 20 ޕޮއިންޓާއެކު އެޓީމު މިވަގުތު އޮތީ ލީގު ތާވަލުގެ 11 ވަނައިގައެވެ

Maldivian
ކޮމެންޓް
Maldivian
ފަހުގެ
STELCO Inside