އިންޑިއާ ފުލުހުންގެ އިދާރާގެ ކޯހެއްގައި ބައިވެރިވެރިވުމަށް ދިވެހި ފުލުހުންތަކެއް އެގައުމަށް!

އިންޑިއާގެ ހައިދަރުއާބާދުގައި ކުރިއަށް ގެންދާ އައިޕީއެސް ޕްރޮބޭޝަނާސް ކޯހުގައި ބައިވެރިވާ ފަސް ފުލުހުން އިންޑިއާއަށް ފުރައިފިއެވެ.

މި ކޯހުގައި ބައިވެރިވުމަށް މި ޑިސެމްބަރު މަހުގެ 7 ވަނަ ދުވަހު އިންޑިއާއަށް ފުރާފައިވަނީ ސަބް އިންސްޕެކްޓަރ އޮފް ޕޮލިސް އަބޫބަކުރު ލުޠުފީ، ސަބް އިންސްޕެކްޓަރ އޮފް ޕޮލިސް ޢާއިޝަތު ހަސަން، ސަބް އިންސްޕެކްޓަރ އޮފް ޕޮލިސް އިބްރާހީމް ޒާހިދު، ސަރޖަންޓް މިޤްދާދު އިބްރާހީމް އަދި ސަރޖަންޓް ހަސަން ރިޔާޒް ޢަބްދުލް ޣަނީއެވެ.

މި ކޯސް ކުރިއަށް ގެންދިއުމަށް ހަމަޖެހިފައިވަނީ މި ޑިސެމްބަރު މަހުގެ 9 ވަނަ ދުވަހުން ފެށިގެން 10 މަސްދުވަހުގެ މުއްދަތަށެވެ.

މި ކޯހުގެ މައިގަނޑު މަގުސަދަކީ މި ޚިދުމަތަށް ބޭނުންވާ ލީޑަރުން ތައްޔާރުކުރުމެވެ. މި ތަމްރީނު ތަކުގެ ސަބަބުން، ފުލުސް އޮފިސަރެއްގެ ހައިސިއްޔަތުން އަދާކުރަންޖެހޭ މަސްއޫލިއްޔަތުތައް ހަރުދަނާގޮތެއްގައި އަދާކުރުމަށް ބޭނުންވާ އިލްމާއި ހުނަރު ލިބިގެންދާނެއެވެ.

އެގޮތުން، ސެންސިޓައިޒޭޝަން، އޮރިއެންޓޭޝަން އެންޑް ކޮމްޕިޓެންސީގެ މެޓްރިކްސް މެދުވެރިކޮށް ކެޕޭސިޓީ ބިލްޑިންގ އިތުރުކުރުން، ޕްރޮފެޝަނަލް އިލްމާއި ވިސްނުން ތަރައްގީކުރުން، އޮގަނައިޒޭޝަނަލް އަދި ކޮމިއުނިޓީ ސްކިލްސް ތަރައްގީކުރުމާއި އިންސާނީ އަހުލާގާއި ހައްގުތަކާއި ވިސްނުން ތަރައްގީކުރުމަށް މަގުފަހިވާނެ ފަދަ ތަމްރީނުތައް ކުރިއަަށް ގެންދާނެއެވެ.

އައިޕީއެސް ޕްރޮބޭޝަނާސް ކޯހަކީ އިންޑިއާގެ އެކި ސްޓޭޓްތަކުން ހޮވޭ ފަރާތްތަކަށް މަރުކަޒީކޮށް ހިންގޭ ތަމްރީނު ޕްރޮގްރާމެކެވެ. މި ތަމްރީނު ޕްރޮގްރާމުގައި ބައިވެރިވުމުގެ ފުރުސަތު 1998 ވަނަ އަހަރުން ފެށިގެން ކޮންމެ އަހަރަކު ވެސް ދިވެހި ފުލުހުންނަށް ދަނީ ލިބެމުންނެވެ.