ހިޔާ ޓަވަރެއްގެ އެޕާޓްމަންޓެއްގައި މީހަކު ރަހީނު ކުރި މައްސަލައިގައި ދައުވާކުރަން ފޮނުވައިފި

މިދިޔަ ނޮވެމްބަރުމަހުގެ ތެރޭގައި ހުޅުމާލޭގެ ހިޔާ ޓަވަރެއްގެ އެޕާޓްމަންޓެއްގައި މީހަކު ރަހީނު ކުރި މައްސަލައިގެ ތަހުގީގު ނިންމައި ދައުވާކުރަން ޕީޖީ އޮފީހަށް ފުލުހުން ފޮނުވައިފި އެވެ.

ނޮވެމްބަރު ހަތްވަނަ ދުވަހުގެ ރޭ ހިޔާ ޓަވަރު އެޗް ނުވަވަނަ ޓަވަރުގެ 20 ވަނަ ފްލޯގެ 11 ވަނަ އެޕާޓްމަންޓުގެ ތެރޭގަ މީހަކު ރަހީނުކުރި މައްސަލައާއި ގުޅިގެން 12 މީހަކު ވަނީ ހައްޔަރުކޮށްފައި އެވެ. ގޭންގެއްގެ ބަޔަކު، މީހަކު ރަހީނުކޮށްގެން ހިޔާ ފްލެޓު ސަރަހައްދުގައި ހުރި ޓަވަރަކަށް ގެންދިޔަ ކަމުގެ އިންޓަލިޖެންސް މައުލޫމާތު ފުލުހުންނަށް ލިބުނު މައުލޫމާތާއެކު ފުލުހުންގެ އިންޓަލިޖެންސާއި ގޭންގްސް ކްރައިމް ޔުނިޓާއި ހުޅުމާލެ ޕޮލިހުން ގުޅިގެން ހިންގި އޮޕަރޭޝަންގައިރަހީނު ކުރި މީހާ ސަލާމަތްކޮށްފައިވަނީ އެޕާޓްމަންޓްގެ ދޮރު ހަލާކުކޮށްގެން ވަދެއެވެ.

ފުލުހުން ވަތްއިރު އެ މީހާގެ ބޯ ބާލުވަފައިވާ ކަމަށް ފުލުހުން ބުނެފައިވެ އެވެ. އޭގެ އިތުރުން އެ މީހާގެ އިނގިލި ބުރި ކޮށްލަން އެ މީހުން އެ ވަގުތު މަސައްކަތްކުރަމުންދިޔަ ކަމަށްވެސް ފުލުހުން ބުނެފައިވެ އެވެ.

އަދި އެކަން ހިނގި އެޕާޓްމެންޓަކީ މަސްތުވާތަކެތީގެ ވިޔަފާރި ކުރުމަށް ބޭނުންކުރާ އެޕާޓްމެންޓެއް ކަމަށްވެސް ފުލުހުން ވަނީ ބުނެފައި އެވެ.

މި މައްސަލައާއި ގުޅިގެން ފުލުހުން މިއަދު ބުނީ އެ މައްސަލައިގައި ދައުވާކުރަން ޕީޖީ އޮފީހަށް ފޮނުވީ މިދިޔަ ހޮނިހިރު ދުވަހު ކަމަށެވެ. މި މައްސަލައާ ގުޅިގެން ބަންދުގައި ތިބި މީހުން ކޯޓުން ދޫކޮށްލާފައިވާ ކަމަށް ފުލުހުން ބުނެ އެވެ.

މި މައްސަލައާއި ގުޅިގެން ހައްޔަރުކުރިން މީހުންގެ ފޮޓޯއާއި ވަނަވަރު ފުލުހުން ވަނީ ހާމަކޮށްފައެވެ.