މާރާމާރީ ހިންގި ކަމުގެ ތުހުމަތުގައި ހައްޔަރުކުރި ޒަކިއްޔާގެ ދަރިފުޅު ޝަރުތުތަކާއި އެކު ދޫކޮށްލައިފި

ނ. ހޮޅުދޫގައި މަރުވެފައި އޮއްވާ ފެނުނު އެ ރަށު ޒަކިއްޔާ މޫސާގެ މަރުގެ މައްސަލައާ ގުޅިގެން ހިންގި މާރާމާރީއަކާއި ގުޅިގެން ހައްޔަރުކުރި ޒަކިއްޔާގެ ދޮށީ ފިރިހެން ދަރިފުޅު ބަންދުން ދޫކޮށްލަން ކޯޓުން އަމުރުކޮށްފިއެވެ.

ޒަކިއްޔާ މޫސާގެ މަރުގެ މައްސަލައާ ގުޅިގެން ހިންގި މާރާމާރީއަކާއި ގުޅިގެން ކޯޓު އަމުރެއްގެ ދަށުން ހައްޔަރު ކުރީ ނ. ހޮޅުދޫ ނިއު ލައިފް، މޫސާ ރިމްޒީ، 30 އެވެ.

ފުލުހުން މިއަދު ބުނީ އިއްޔެ ހައްޔަރުކުރި ރިމްޒީގެ ބަންދާއި މެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރުތު ކުރުމަށްފަހު ދޫކޮށްލާފައިވާ ކަމަށެވެ.

ނަމަވެސް ޝަރުތުކުރީ ކޮން ކަމަކަށް ކަމެއް ފުލުހުން ހާމައެއް ނުކުރެއެވެ.

މިދިޔަ ސެޕްޓެމްބަރު މަހު ޒަކިއްޔާ މަރުވެފައި އޮއްވާ ފެނުނީ އޭނާ ދިރިއުޅޭ ގޭގެ ހުރި ގުދަނުގެ ދޮރު ކައިރިންނެވެ. އަދި އޭނާގެ ކަރަށް ފުން ޒަހަމްތަކެއް ލިބިފައިވާއިރު ހަށިގަނޑު ކައިރީގައި ވަޅިއެއް އޮތެވެ. މި މައްސަލައާއި ގުޅިގެން އެރަށުގެ ގިނަ ބަޔަކު ޒަކިއްޔާގެ އާއިލާއަށް ބޮޑެތި ތުހުމަތުތަކެއް ކުރަމުން ދިޔަ ނަމަވެސް ފުލުހުން ބުނާގޮތުގައި އޭނާގެ މަރުގައި ޝައްކުކުރެވޭ ކަންތައްތަކެއް އަދި މިހާތަނަށް ތަހުގީގަށް ހާމަވެފައި ނުވެއެވެ.