ކުޅިވަރުގެ ދިގުރާސްތާ ޕްލޭންގައި ހިމެނޭ ކަންކަމާ ގުޅޭގޮތުން މަޝްވަރާކޮށްފި

ރާއްޖޭގެ ކުޅިވަރު ކުރިއެރުވުމުގެ ދިގުރާސްތާ ޕްލޭންގައި ހިމެނޭ ކަންކަމާ ގުޅޭގޮތުން، ކުޅިވަރާ ގުޅުންހުރި ފަރާތްތަކާ މަޝްވަރާކޮށްފި އެވެ.

އެމެރިކާގެ ދެ ކޮންސަލްޓަންޓުންގެ އެހީގައި ތައްޔާރުކުރަމުން އަންނަ ކުޅިވަރުގެ ދިގުރާސްތާ ޕްލޭންގައި މިހާރު ހުރި ކަންކަމަށް އަމަލުކުރަން ފެށުމުގެ ކުރިން ގިނަ ފަރާތްތަކެއްގެ ހިޔާލު ހޯދައި އެކަންކަމާ ގުޅޭގޮތުން މިދިޔަ ހަފްތާ ބަންދުގައި ވަނީ ގިނަ މަޝްވަރާތަކެއް ކުރެވިފަ އެވެ.

މިގޮތުން ކުޅިވަރު އެސޯސިއެޝަންތަކާއި، ސްޕޯޓްސް ކައުންސިލާއި، ކޮމިޝަނަރ އޮފް ސްޕޯޓްސްގެ އޮފީހާއި، ސިޓީ ކައުންސިލްތަކުގެ މޭޔަރުންނާއި ހެލްތު މިނިސްޓްރީ އާއި ތަޢުލީމީ ވުޒާރާގެ ފަރާތްތަކުންވެސް މި މަޝްވަރާތަކުގައި ބައިވެރިވި އެވެ.

މިވަގުތު މި ޕްލޭންގައި ހިމެނޭ މުހިންމު ކަންކަމަށް ބަލާއިރު، ރާއްޖެ ތިން ސަރަހައްދަކަށް ބަހާލައިގެން ކުޅިވަރު ކުރިއެރުވުމާއި، އެކި މަރުހަލާތަކަށް ބަހާލައިގެން އެކަންކަން ކުރުން ހިމެނެ އެވެ.

މި ބައްދަލުވުންތަކުގެ ފަހު ބައެއްގެ ގޮތުން ކުޅިވަރު ކޯޗުންނާއި، ކުރީގެ ކުޅުންތެރިންނާއި، މި ދާއިރާގެ ޓެކްނިކަލް ފަރާތްތަކާވެސް ވަނީ ބައްދަލުކޮށްފަ އެވެ. މައިގަނޑު ބޭނުމަކީ އެ ބޭފުޅުންގެ ތަޖުރިބާ އާއި ހިޔާލު ހޯދައި، މި ޕްލޭން އަކީ ދިވެހިރާއްޖޭގެ ކުޅިވަރު އާއިލާގެ އެންމެންގެ ހިޔާލާއި މަޝްވަރާއާއެކު ތައްޔާރުކުރެވޭ ޕްލޭނަކަށް ހެދުމެވެ.