ސްޕޯޓްސް މިނިސްޓްރީ އިން އިސްރަށްވެހިންގެ ނާދީއަށް ޓީޓީ ކުޅޭނެ ސާމާނު ހަދިޔާކޮށްފި

އިސްވެހިންގެ ނާދީއަށް ޓީޓީ ކުޅޭނެ ބައެއް ސާމާނު ކުޅިވަރާއި ބެހޭ ވުޒާރާއިން ހަދިޔާކޮށްފި އެވެ.

އިސްރަށްވެހިންގެ ނާދީގެ ކަންކަން ބަލަހައްޓާ އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން މިއަދު ބުނީ އިސްރަށްވެހިންގެ ނާދީގެ މެންބަރުންނަށް ޓޭބަލް ޓެނިސް ކުޅެވޭނެ އިންތިޒާމް ހަމަޖައްސައިދިނުމަށްޓަކައި މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަންގެ ފަރާތުން ޓޭބަލް ޓެނިސް ކުޅުމަށް ބޭނުންވާ ތަކެތި އެވުޒާރާއާއި މިހާރު ހަވާލުކޮށްފައިވާ ކަމަށެވެ.

އެގޮތުން އިސްރަށްވެހިންގެ ނާދީގައި ޓީޓި ކުޅިވަރު ޕްރޮގްރާމް ހިންގުމަށް ހަމަޖެހިފައިވަނީ ޓޭބަލް ޓެނިސް އެކަޑެމީގެ އެހީތެރިކަމާއެކުއެވެ. މި ޕްރޮގްރާމްގެ ސަބަބުން ދުޅަހެޔޮ ޞިއްޙަތެއްގައި ތިބުމަށް އިސްރަށްވެހިންނަށް މަގުފަހިވުމުގެ އިތުރުން، ޖީލުތަކުގެ މެދުގައި އޮންނަ ހުސްކަން ކުޑަކުރުމަށް ފުރުޞަތު ލިބިގެންދާނެ ކަމަށް ވުޒާރާއިން ބުނެއެވެ.

އިސްރަށްވެހިންގެ ނާދީއަކީ އިސްރަށްވެހިންގެ އިޖުތިމާޢީ، ނަފްސާނީ އަދި ޖިސްމާނީ ދުޅަހެޔޮކަން ކަށަވަރުކުރުމަށް ތަފާތު އެކި ޕްރޮގްރާމްތަކާއި ހަރަކާތްތައް ހިންގަމުންދާ، އިސްރަށްވެހިންގެ ތެރޭގައި ބޮޑު މަޤުބޫލުކަމެއް ހޯދައިފާ މަރުކަޒެކެވެ. މި ހަރަކާތްތަކުގައި ބައިވެރިވުމުގެ ފުރުޞަތު 55 އަހަރުން މަތީގެ ކޮންމެ ފަރާތަކަށްވެސް އޮންނާނެއެވެ.