ހަޔާ އެޑިއުކޭޝަންގެވަފުދުން މެލޭޝިޔާގައި ކިޔަވަމުންދާ ދިވެހި ދަރިވަރުންނާއި ބައްދަލުކުރައްވައިފި

މިނިސްޓްރީ އޮފް ހަޔަރ އެޑިޔުކޭޝަން،ލޭބަރ އެންޑް ސްކިލްސް ޑިވެލޮޕްމަންޓް އިން މެލޭޝިޔާގެ ޔުނިވާސިޓީތަކުގައި މަތީ ތަޢުލީމު ހާޞިލުކުރަމުންދާ ދަރިވަރުންނާއި ބައްދަލުކުރައްވައިފިއެވެ.

މިނިސްޓްރީގެ އިސްބޭފުޅުން އެ ދަރިވަރުންނާއި ބައްދަލުކުރައްވާފައިވަނީ އެޑިޔުކޭޝަން މެލޭޝިޔާ ގްލޯބަލް ސަރވިސެސް (އީއެމްޖީއެސް)ގެ ދަޢުވަތަކަށް މެލޭޝިޔާއަށް ކުރެއްވި ދަތުރުފުޅުގައެވެ.

މި ދަތުރުގައި، މެލޭޝިޔާގައި މަތީ ތަޢުލީމު ހާޞިލުކުރަމުންދާ ދިވެހި ދަރިވަރުންނާއި ބައްދަލުކުރުމުގެ މަޤްސަދަކީ އެ ދަރިވަރުން ބޭރު ޤައުމެއްގައި މަތީ ތަޢުލީމު ހާޞިލުކުރަމުންދާއިރު، ދިމާވާ ގޮންޖެހުންތަށް ދެނެގަނެ،އެ ދަރިވަރުންނަށް ދަޢުލަތުގެ ފަރާތުން ފޯރުކޮއްދެވޭނެ އެހީތެރިކަމާއި ގުޅޭގޮތުން މަޝްވަރާކުރުމެވެ. އެގޮތުން، އެ ދަރިވަރުން ވަނީ މިނިސްޓްރީގެ އިސްބޭފުޅުންގެ އިތުރުން ދިވެހިރާއްޖެ އިން މެލޭޝިޔާއަށް ކަނޑައަޅާފައިވާ ހައި ކޮމިޝަންގެ އިސްބޭފުޅުންނާއި ބައްދަލުކޮށް، ދަރިވަރުންގެ ކަންބޮޑުވުންތަށް ޙިއްސާކޮއްފައެވެ.

މިނިސްޓްރީގެ ބައެއް އިސްބޭފުޅުން ވަނީ މެލޭޝިޔާގެ އައިއެމްޔޫ ޔުނިވާސިޓީއަށް ޒިޔާރަތްކޮށް، އެ ޔުނިވާސިޓީގައި މަތީ ތަޢުލީމު ހާޞިލުކުރަމުންދާ ދިވެހި ދަރިވަރުންގެ އިތުރުން އީއެމްޖީއެސްގެ ފަރާތުން އިންތިޒާމްކޮއްގެން ކުރިއަށްގެންދިޔަ، "ފެސްޓިވަލް އޮފް އައިޑިޔާސް" ފެޔަރގައި ބައިވެރިވި ދިވެހި ދަރިވަރުންނާއި ބައްދަލުކޮށް، އެ ދަރިވަރުންނަށް ފޯރުކޮއްދެވެން ހުރި އެހީތެރިކަމާއިމެދު މަޝްވަރާކުރައްވާފައެވެ.