ސިޓީގެ ދަރަޖަ ބާތިލުކުރަން ހައިކޯޓަށް ހުށަހެޅި މައްސަލައަކީ ރައީސްއާއި ދެކޮޅަށް ސަރުކާރުގެ ތެރެއިން ހިންގާ އަމަލެއް - އަލްސަން

ރާއްޖޭގައި އެންމެ ފަހުން ސިޓީގެ ދަރަޖަ ދިން ތިނަދޫގެ އެދަރަޖަ ބާތިލުކުރަން ސަރުކާރުގެ ޑެޕިއުޓީ މިނިސްޓަރަކު ހައިކޯޓަށް ހުށަހަޅާފައިވާ މައްސަލައަކީ ރައީސުލްޖުމްހޫރިއްޔާއާ ދެކޮޅަށް ސަރުކާރުގެތެރެއިން ހިންގާ ޢަމަލެއްކަމުގައި ދެކޭ ކަމަށް ތިނަދޫ ދެކުނު ދާއިރާގެ މެމްބަރު އަލްސަން އަހުމަދު ވިދާޅުވެއްޖެ އެވެ.

ގދ. ތިނަދޫގެ އާބާދީގައި 10،000 ހަމަނުވާތީ އެ ރަށުގެ ސިޓީގެ ދަރަޖަ ބާތިލުކުރަން ހައި ކޯޓަށް ދުސްތޫރީ މައްސަލައެއް މިދިޔަ ބުރާސްފަތި ދުވަހު ހުށަހެޚުއްވީ އެންވަޔަރަމަންޓް މިނިސްޓްރީގެ ޑެޕިއުޓީ މިނިސްޓަރު އަދި ގާނޫނީ ވަކީލު މުހައްމަދު ރާގިބެވެ.

މިކަމާއި ގުޅިގެން މިއަދު މީސްމީޑިއާގައި މެމްބަރު އަލްސަން ކުރެއްވި ޕޯސްޓެއްގައި ވިދާޅުވީ ރައީސުލްޖުމްހޫރިއްޔާގެ ޤަރާރަކުން ތިނަދުއަށް ސިޓީއެއްގެ ދަރަޖަ ދީ، ޤާނޫނު ނަންބަރު:2010/7 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނު)ގެ 51ވަނަ މާއްދާގެ (ރ)ގެ ދަށުން ތިނަދޫ ސިޓީ ކައުންސިލެއް ރައީސުލް ޖުމްހޫރިއްޔާ އުފައްދާފައިވަނިކޮށް، ސިޓީ ދަރަޖައާމެދު ސުވާލު އުފައްދައި، ރައީސުލްޖުމްހޫރިއްޔާގެ ސިޔާސަތު ތަންފީޒުކުރުމަށް ހުރަސްއަޅައި، ރައީސުލްޖުމްހޫރިއްޔާގެ މަޤާމަށާއި ރައީސުލްޖުމްހޫރިއްޔާއަށް ކުޑައިމީސްކޮށް، ރައީސުލްޖުމްހޫރިއްޔާއަށް ޤާނޫނީގޮތުން ލިބިދޭ ޤާނޫނީ ބާރު ކެނޑޭގޮތަށް، ރައީސުލްޖުމްހޫރިއްޔާގެ ރުހުމާއެކު މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާރޖީ އަށް އައްޔަންކޮށްފައިވާ ޑެޕިއުޓީ މިނިސްޓަރު މުޙައްމަދު ރާޣިބް އަޙްމަދުގެ ފަރާތުން ކޯޓަށް ހުށަހަޅާފައިވާ ދުސްތޫރީ މައްސަލައަކީ ރައީސުލްޖުމްހޫރިއްޔާއާ ދެކޮޅަށް ސަރުކާރުގެތެރެއިން ހިންގާ ޢަމަލެއްކަމުގައި ދެކޭ ކަމަށެވެ.

އަދި އެއީ ތިނަދޫ ރައްޔިތުންގެ މަސްލަޙަތާއި ހަމަޖެހުން ނަގާލުމަށް ހިންގާ ޢަމަލެއްކަމުގައި ދެކޭތީ، ސަރުކާރުގެ ސިޔާސަތު ތަންފީޒުކުރުމަށް ހުރަސްއަޅާ އެފަދަ ފަރާތްތަކާމެދު އަވަސް ފިޔަވަޅު އަޅުއްވައި ދެއްވުމަށް ތިނަދޫ ދެކުނު ދާއިރާގެ ރައްޔިތުން ހިމެނޭހެން މުޅި ތިނަދޫ ރައްޔިތުންގެ ފަރާތުން އަދުގެ ރައީސުލްޖުމްހޫރިއްޔާ އަށް ގޮވާލާ ކަމަށްވެސް އަލްސަން ވިދާޅުވިއެވެ.

މެމްބަރު އަލްސަން މިފަދައިން ވިދާޅުވިއރު އިރު މި މައްސަލައަކީ ރައީސް ޑރ މުހައްމަދު މުއިއްޒު ދެއްވި ސިޔާސީ މަގާމެއްގައި ހުންނެވި ރާގިބު ތިނަދޫއާއި މެދު ގެންގުޅޭ ޒަމާންވީ ޒާތީ ހަސަދަވެރިކަމެއްގެ ތެރެއިން ރާއްޖޭގެ ވަލިއްޔުލްއަމުރާއި ދެކޮޅަށް ކުރާ ބަގާވާތެއްގެ ގޮތުގައި ތިނަދޫ ސިޓީގެ މޭޔަރު ސައުދު އަލީވެސް މިއަދު ވަނީ ސިފަކުރައްވާފައި އެވެ. އެގޮތުން މި މައްސަލަ ހުށަހަޅާފައިވަނީ ރައީސް އޮފީހާއި ދެކޮޅަށް ކަމުން މިއީ އެއޮފީހުގެ އެންމެ އިސްވެރިޔާ އަދި ރާއްޖޭގެ ރައީސުލްޖުމްހުރިއްޔާގެ ގޮތުގައި މިވަގުތު ހުންނެވި ޑރ މުހައްމަދު މުއިއްޒުއަށްވެސް ގޮން ޖައްސަވައި ރާގިބު ހުށަހެޅުއްވި މައްސަލައެއް ކަމަށް ސައުދު ގާފު ނޫހަށް ދެއްވި އިންޓަވިއުއެއްގައި ވިދާޅުވިއެވެ.

ޑެޕިއުޓީ މިނިސްޓަރު ރާގިބު ހައިކޯޓަށް ހުށަހެޅި ދުސްތޫރީ މައްސަލާގައި ވަނީ ތިނަދޫއަށް ރައީސް އޮފީހުގެ ގަރާރަކުން ސިޓީގެ ދަރަޖަ ދީފައިވަނީ އާބާދީ އާއި ގުޅޭގޮތުން ދައުލަތުގެ ލިޔުމެއް ގަސްދުގައި އޮޅުވާލައި، ދައުލަތުގެ އިދާރާއަކަށް ދޮގު މައުލޫމާތު ދީގެން ކަމަަށް ތުހުމަތުކޮށް ކައުންސިލާއި ކުރީގެ ރައީސުލްޖުމްހޫރިއްޔާގެ މައްސަލަ ބެލުމަށާއި ތިނަދޫއަށް ދީފައިވާ ސިޓީގެ ދަރަޖަ ބާތިލުކޮށްދޭންށެވެ.

ތިނަދޫއަށް ސިޓީގެ ދަރަޖަ ދިނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ކުރީގެ ރައީސް އިބްރާހިމް މުހައްމަދު ސޯލިހުގެ ގަރާރަކުންނެވެ. އެގޮތުން ސިޓީގެ ދަރަޖަ ދިނުމުގެ ކުރިން ރިޔާސީ އިންތިހާބުގެ ކެމްޕެއިންގެ ތެރޭގައި އޭރުގެ ރިޔާސީ ކެނޑިޑޭޓު އަދި މިހާރުގެ ރައީސް ޑރ މުހައްމަަދު މުއިއްޒު ވެސް ވަނީ ތިނަދޫއަށް ސިޓީގެ ދަރަޖަ ދެއްވާނެކަން އިއުލާނުކުރައްވާފައި އެވެ.

ތިނަދޫއަށް ސިޓީގެ ދަރަޖަ ދެއްވުމަށް ފަހު އޭރުގެ ރައީސް އިބްރާހިމް މުހައްމަދު ސޯލިހު ވިދާޅުވެފައިވަނީ ލާމަރުކަޒީ ގާނޫނުގައިވާ ބުނާ ހުރިހާ ޝަރުތުތަކެއް ފުރިހަމަ ވާތީ ތިނަދޫ ސިޓީއަކަށް ހަދަން ނިންމައި، ގަރާރުގައި ސޮއިކުރެއްވީ ކަމަށެވެ. އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ ގޮތުން ސިޓީއެއްގެ ދަރަޖަ ދިނުމުގައި ބަލާ މިންގަނޑުގެ ތެރޭގައި އާބާދީ 10،000 އަށް ވުރެ ދަށްނުވުން ހިމެނެ އެވެ.

މިހާރުގެ ރައީސް ޑރ މުހައްމަދު މުއިއްޒު ވަނީ މިއަހަރުގެ މާޗު މަހުގެ ތެރޭގައި ހުވަދުއަތޮޅު ދެކުނުބުރީ ތިނަދޫ ކައުންސިލަކީ، "ތިނަދޫ ސިޓީ ކައުންސިލް" ގެ ގޮތުގައި އަދި "ހުވަދުއަތޮޅު ދެކުނުބުރީ ތިނަދޫ ކައުންސިލްގެ އިދާރާ" އަކީ "ތިނަދޫ ސިޓީ ކައުންސިލްގެ އިދާރާ"ގެ ގޮތުގައި ހަމަޖައްސަވާފައި އެވެ. އެނިންމުން ރައީސް ނިންމެވީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު (ޤާނޫނު ނަންބަރު 2010/7) 51 ވަނަ މާއްދާގެ (ރ) ގެ ދަށުން ކަމަށް ރައީސް އޮފީހުން މާޗު މަހުގެ 26 ވަނަ ދުވަހު ނެރުނު ދެންނެވުމެއްގައި ބުނެފައި ވެއެވެ.