އިމާމަކަށާއި ފުލުހަކަށް ވަޅިން ހަމަލާދޭން އުޅުނު މީހާ ތަހުގީގު ނިމެންދެން ބަންދަށް!

ހުކުރު ދުވަހު ހުޅުމާލޭގައި މިސްކިތެއްގެ އިމާމަކަށާއި ފުލުހަކަށް ވަޅިން ހަމަލާދޭން މަސައްކަތްކުރުމުން ހައްޔަރުކުރި މީހާގެ ބަންދު ކޯޓުން ޖަހައިފި އެވެ.

ފުލުހުން ހުކުރު ދުވަހު ބުނީ ހުޅުމާލެ ފޭސް 1 ގައި ތޫނު އެއްޗެއް ބޭނުންކޮށްގެން މީހަކަށް ހަމަލާދޭން އުޅުނު ކަމުގެ ތުހުމަތުގައި 33 އަހަރުގެ ދިވެހި ފިރިހެނަކު އެދުވަހުގެ 18:30 ހާއިރު ހައްޔަރުކޮށްފައިވާ ކަމަށެވެ. އެގޮތުން އެވަގުތު އެމީހާ ހުއްޓުވަން އުޅުނު ފުލުހަކަށް ވެސް ތޫނު އެއްޗެއް ބޭނުންކޮށްގެން ހަމަލާދޭން އެމީހާ މަސައްކަތްކުރި ކަމަށް ފުލުހުން ވަނީ ބުނެފައި އެވެ.

މައުލޫމާތުލިބިފައިވާ ގޮތުގައި އޭނާ ހަމަލާދޭން މަސައްކަތްކުރީ ހުޅުމާލޭގެ މިސްކިތެއްގެ އިމާމަކަށެވެ.

ހައްޔަރުކުރި މީހާގެ ވަނަވަރާއި ފޮޓޯ އިއްޔެ ފުލުހުން ވަނީ އާންމުކޮށްފައެވެ. އެގޮތުން އެ މައްސަލައާއި ގުޅިގެން ހައްޔަރުކޮށްފައިވަނީ އދ. ދަނގެތި، ލިލީގެ، އުމުރުން 33 އަހަރުގެ ހުސެއިން ފާއިގުއެވެ.

ފުލުހުން މިއަދު ބުނީ އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރުކުރުމުން ތަހުގީގު މަރުހަލާ ނިމެންދެން ބަންދުކުރުމަށް ކޯޓުން އަމުރުކޮށްފައިވާ ކަމަށެވެ.

މިކަމާއި ގުޅުންހުރި ވީޑިއޯއެއް މިހާރު މީސްމީޑިއާގައި ދައުރު ވަމުންދާއިރު އެވީޑިއޯއިން ފެންނަ ގޮތުގައި އެމީހާ ފުލުހުން ހައްޔަރުކުރުމާއި އެކު އޭނާއަކީ ނަފްސާނީ މައްސަލަ ހުންނަ މީހެއް ކަމަށް އޭނާ ވަނީ އަމިއްލައަށް ބުނެފައި އެެވެ.