މަސްބޯޓުން އަތުލައިގަތް މަސްތުވާތަކެތީގެ އަގު މަގުމަތީ އަގުން ނަމަ އެއް ބިލިއަން ރުފިޔާއަށް އަރާނެ - ފުލުުހުން

ރާއްޖޭގެ ކަނޑުގެ ސަރަހައްދުން އަތުލައިގަތް ބޯޓުން ފެނުނު މަސްތުވާތަކެތީގެ އަގު މަގުމަތީ އަގުން ނަމަ އެއް ބިލިއަން ދިވެހި ރުފިޔާއަށް އަރާނެ ކަމަށް ފުލުހުން ބުނެފި އެވެ.

ރޭ ރާއްޖޭގެ ކަނޑުގެ ސަރަހައްދުން އަތުލައިގަތް ބޯޓަކުން ގިނަ އަދަދެއްގެ މަސްތުވާތަކެތި ފެނުނު މައްސަލައާއި ގުޅިގެން ފުލުހުން މިއަދު ބޭއްވި ކުއްލި ނޫސްވެރިންގެ ބައްދަލުވުމުގައި ފުލުހުންގެ ކޮމިޝަނަރު އަލީ ސުޖާއު ވިދާޅުވީ ލަންކާއަށް ނިސްބަތްވާ އެ މަސްބޯޓުން 468.6 ކިލޯގެ މަސްތުވާތަކެތި ފެނިފައިވާ ކަމަށެވެ.

އެގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ސީޕީ ވިދާޅުވީ ފެނުނު މަސްތުވާތަކެތީގެ އަގު މަގުމަތީ އަގުން ނަމަ އެއް ބިލިއަން ދިވެހި ރުފިޔާއަށް އަރާ ކަމަށެވެ. އަދި ތަހުގީގުގެ ވަރަށް ކުރީ ސްޓޭޭޖެއް ކަމުން މި މަސްތުވާތަކެއްޗަކީ ރާއްޖޭގެ އެއްވެސް ޑްރަގް ނެޓްވޯކަކާއި ގުޅުންހުރިި މަސްތުވާތަކެތި ކަން އަދި ކަށަވަރުކުރެވިފައި ނުވާ ކަންވެސް ސީޕީ ހާމަކުރެެއްވި އެވެ.

ފެނުނު މަސްތުވާތަކެތި ތަހުގީގުގެ ފުރަތަމަ މަރުހަލާގައި ޓެސްޓު ކުރި އިރު އެތަކެތި މަސްތުވާތަކެތީގެ ބާވަތެއް ކަމަށްވާ މެތަށާއި ކޮކެއިންއަށް ޕޮސިޓިވް ވެފައިވާ ކަމަށް ސީޕީ ވިދާޅުވިއެވެ. އެގޮތުން އެބޯޓުން ފެނުނު މަސްތުވާތަކެތީގެ ތެރޭގައި ހިމެނެނީ 344 ކިލޯގެ މެތާއި 124 ކިލޯގެ ކޮކެއިން ކަމަށް މިހާތަނަށް ތަހުގީގަށް އެނގިފައިވާކަން ސީޕީ ހާމަކުރެއްވި އެވެ.

ފުލުހުން ބުނީ ހދ މަކުނުދޫ ބޭރުން ސްރީލަންކާގެ މަސްބޯޓެއް ކަމަށް ބެލެވޭ މަސްބޯޓެއް އަތުލައިގެންފައިވާ ކަމުގެ ރިޕޯޓު ސިފައިން ރޭ ދަންވަރު 12:40 ހާއިރު ފުލުހުންނަށް ދީފައިވާ ކަމަށެވެ. އަދި އެބޯޓު މިއަދު ހެނދުނު ކުޅުދުއްފުށީ ސިޓީގެ ބަނދަރަށް ގެނައުމާއި އެކު ކޯސްޓްގާޑާއި ކުޅުދުއްފުށީ ފުލުހުން އެ ބޯޓަށް އަރައި ބަލާފާސްކުރަން ފެށީ ހެނދުނު 09:30 ހާއިރު ކަމަށެވެ.

މި ބޯޓު އަތުލައިގަތް އިރު ބޯޓުގައި ލަންކާއަށް ނިސްބަތްވާ 5 ފިރިހެނުން ތިބި ކަމަށް ފުލުހުން ބުނެއެވެ.