ޕިކަޕެއްގައި އުފުލި ކުލަ ފާޓާތަކެއް މަގުމައްޗަށް ބަންޑުންވެއްޖެ

މާލޭގައި ޕިކަޕެއްގައި އުފުލި ކުލަ ފާޓާތަކެއް މަގުމައްޗަށް ބަންޑުން ވެއްޖެ އެވެ.

ސޯޝަލް މީޑިއާގައި ދައުރުވާ ވީޑިއޯއިން ފެންނަ ގޮތުގައި އޭގެ ތެރެއިން ބައެއް ފާޓާތައް ފަޅައިގެން ގޮސް މުޅި މަގުގައި އޮތީ "ކުލަލެވިފަ" އެވެ. އަދި އެ ސަރަހައްދުގައި ހުރި ސައިކަލުތަކަށް ވެސް ވަނީ ކުލަ އެޅިފަ އެވެ.

މައުލޫމާތު ލިބިފައިވާ ގޮތުގައި މި ހާދިސާ ހިނގީ މާލޭގެ މާވެޔޮމަގާއި ކޯރުކެނޑި މަގާ ގުޅޭ ހިސާބުގައި އެވެ. ކުލަ ފާޓާތައް މަގުމައްޗަށް ބަންޑުންވީ އެސަރަހައްދުގައި ހުރި ގުދަނަކަށް އެތަކެތި ބާލަނިކޮށް ކަމަށް މައުލޫމާތު ލިބެއެވެ.

ކުލަ އެޅުމާއި ގުޅިގެން މިވަގުތު އެސަރަހައްދު އޮތީ މަގު ބަންދުކޮށްފައި އެވެ. އަދި ކުލަ ފާޓާތައް ނެގުމަށްފަހު މަގު ސާފުކުރުމުގެ މަސައްކަތް މިހާރު ދަނީ ކުރަމުންނެވެ.