ރައީސް މުޢިއްޒު ސަރުކާރު ހިންގަވާފައިވަނީ ޒިންމާދާރުކަމާއެކު މާލިއްޔަތަށް އަމާނާތްތެރިވުމާއެކު، ހާމަކަންބޮޑުގޮތެއްގައި - ޕީއެންސީ

ފާއިތުވެދިޔަ އެއް އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސަރުކާރު ހިންގަވާފައިވަނީ ޒިންމާދާރުކަމާއެކު ރައްޔިތުންގެ މާލިއްޔަތަށް އަމާނާތްތެރިވުމާއެކު، ހާމަކަންބޮޑުގޮތެއްގައި ރައްޔިތުންނަށް ހުރިހާ މައުލޫމާތެއް ފޯރުކޮށްދީގެން ކަމަށް އެމަނިކުފާނު ނިސްބަތްވެވަޑައިގަންނަވާ ވެރިކަން ކުރާ ޕީއެންސީން ބުނެފި އެވެ.

ޕީއެންސީން މިއަދު ނެރުނު ޚާއްސަ ބަޔާނެއްގައި ބުނެފައިވަނީ ރައީސް ޑރ މުހައްމަދު މުއިއްޒުގެ ސަރުކާރަކީ ހާމަކަންބޮޑު، މާލީގޮތުން ޒިންމާދާރު ސަރުކާރެއްކަމަށާއި އެގޮތުން ދައުލަތުގެ ހަރަދުތައް ކުޑަކުރުމަށް 2024 ވަމަ އަހަރު ސަރުކާރުން އެޅި ފިޔަވަޅުތަކުގެ ސަބަބުން އަހަރުން އަހަރަށް ހަލުވިކޮށް ބޮޑުވަމުންއައި ހަރަދުތައް ކޮންޓުރޯލް ކުރެވުނު ކަމަށެވެ. އަދި ފާއިތުވި ތިން އަހަރު އެވްރެޖްކޮށް ކޮންމެ އަހަރަކު 15 އިންސައްތައިން ދައުލަތުގެ ހަރަދުތައް އިތުރުވަމުންދިޔަ ނަމަވެސް ނިމުނު އަހަރާއި އަޅާބަލާއިރު މިއަހަރުގެ ދައުލަތުގެ ހަރަދުތައް އިތުރުވީ އެންމެ 2.5 އިންސައްތަކަމަށް ބަޔާނުގައި ވަނީ ބުނެފައި އެވެ.

ބަޔާނުގައި ޕީއެންސީން ބުނީ ކުރީ ސަރުކާރުން ބޭރުގެ ފަރާތްތަކުގެ އެހީތެރިކަމުގައި ހިންގި މަޝްރޫއުތަކުގެ ހަރަދުތައް ރެކޯޑު ނުކޮށް މިއަހަރުގެ ހަރަދުތަކުގެ ތެރޭގައި އެހަރަދުތައް ހިމަނަން ޖެހުމުން ކުރިމަތިވި މައްސަލަތައް ހައްލުކޮށް ކޮންމެ ހަފްތާއަކު އެއްފަހަރު ދައުލަތުގެ ހަރަދުބަރަދާއި އާމްދަނީގެ ތަފްސީލުތައް ފިނޭސްމިނިސްޓްރީން ދަނީ އާންމު ކުރަމުން ކަމަށެވެ. އެންމެ ފަހުން ހަރަދުތައް އާންމު ކުރީ މި މަހުގެ 7 ވަނަ ދުވަހުގައި ކަމަށް ބަޔާނުގައި ބުނެފައި ވެއެވެ.

މީގެ އިތުރުން އާރްޓީއައިތަކަށް ޖަވާބުދިނުމުގައި މި ސަރުކާރުން އިހުމާލުވެފައި ނެތްކަން ތަފާސްހިސާބުތަކުން ފެންނަން އެބައޮތްކަމަށާއި ދައުލަތުގެ ކުންފުނިތަކުން އާރުޓީއައިއަށް ޖަވާބުދޭންޖެހޭނެ ކަމަށް ކޯޓުތަކުން ކަނޑައެޅުމުންވެސް ޖަވާބުނުދީ ހިފަހައްޓާފައި އޮތް ކަމަށާއި އެ ސިޔާސަތު ނިމުމަކަށް ގެންނެވީ ރައީސް މުއިއްޒު ކަމަށް ޕީއެންސީން ވަނީ ބުނެފައެވެ.

މީގެއިތުރަށް ޕީއެންސީގެ ބަޔާނުގައި ބުނީ ރާއްޖޭގެ ތާރީހުގައިވެސް ފުރަތަމަ ފަހަރަށް ކެބިނެޓުން ނިންމާ ނިންމުންތައް ފެންނާނެހެން އާންމުކުރަން ފެށީ މި ސަރުކާރުން ކަމަށާއި ރައްޔިތުންނަށް ފެންނަން ހުރި މިފަދަ ހަގީގަތްތައް އޮޅޭ ގޮތަށް ދައުލަތުން ފައިސާ ދީގެން ހިންގާ ދައުލަތުގެ މުއައްސަސާއެއް އަދި ޒިންމާދާރު އިދިކޮޅު ސިޔާސީ ޕާޓީއެއްގެ މަގާމު އަދާކުރަންޖެހޭ އެމްޑީޕީން މައުލޫމާތު ފެތުރުމަކީ ބައިލައިގަނެވޭނެކަމެއް ނޫންކަމަށެވެ.