ޕޯޗުގަލް އަތުން ހޯދި ޕޮއިންޓާއެކު ގުރޫޕްގެ ދެވަނަ ޓީމުގެ ގޮތުގައި ކްރޮއޭޝިއާ ކުއާޓާ ފައިނަލުން ޖާގަ ހޯދައިފި

ޔުއެފާ ނެޝަނަލް ލީގު ފުރަތަމަ ޑިވިޝަން ގުރޫޕް އެކެއްގައި ރޭ އަމިއްލަ ދަނޑުގައި ޕޯޗުގަލް އާއި ދެކޮޅަށް ކުޅުނު މެޗު 1-1 ގެ ނަތީޖާއަކުން އެއްވަރުކޮށް ކްރޮއޭޝިއާ އިން ގުރޫޕްގެ ދެވަނަ ޓީމުގެ ގޮތުގައި މުބާރާތުގެ ކުއާޓާ ފައިނަލުން ޖާގައެއް ކަށަވަރުކޮށްފިއެވެ.

މުބާރާތުގައި ޕޯޗުގަލް އެންމެފަހުން ކުޅުނު މެޗުގައި 5-1 ގެ ނަތީޖާއަކުން މޮޅުވެފައިވާއިރު، ކްރޮއޭޝިއާ އެންމެ ފަހުން ކުޅުނު މެޗުގައި ސްކޮޓްލޭންޑް އަތުން 1-0 ގެ ނަތީޖާއަކުން އެޓީމު ވަނީ ބަލިވެފައެވެ. އަދި މިދެޓީމު އެންމެ ފަހުން ކުޅުނު މެޗު 2-1 ގެ ނަތީޖާއަކުން ކާމިޔާބުކޮށްފައިވަނީ ޕޯޗުގަލް އެވެ.

މިމެޗަށް ނުކުތްއިރު ވެސް ގުރޫޕްގެ އެއްވަނަ ޓީމުގެ ގޮތުގައި ކުއާޓާ ފައިނަލުގެ ޖާގައެއް ޕޯޗުގަލްއަށް ކަށަވަރުވެފައި އޮތުމާއެކު، އެޓީމުން މެޗު ފެށީ ބަދަލުތަކަކާއެކުގައެވެ. އެގޮތުން ކޯޗު ރޮބާޓޯ މާޓިނޭޒް މިމެޗަށް އެކުލަވާލި ސްކޮޑުގައި ކެޕްޓަން ކްރިސްޓިއާނޯ ރޮނާލްޑޯގެ އިތުރުން މިޑްފީލްޑަރު ބުރޫނޯ ފެނާންޑޭޒް ވެސް ހިމަނާފައެއް ނުވެއެވެ.

މެޗުގެ ފުރަތަމަ ހާފުގައި މޮޅަށް ކުޅެ ޕޯޗުގަލް އިން މެޗު ޑޮމިނޭޓްކުރިއިރު، އެޓީމުން މެޗުގެ ލީޑުހޯދީ ފުރަތަމަ ހާފުގެ 33 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ޗެލްސީގެ ފޯވާޑް ޖޮއާއު ފެލިކްސް އެވެ. މިއީ އެޓީމުގެ މިޑްފީލްޑަރު ވިޓީނިއާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ކްރޮއޭޝިއާ އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 65 ވަނަ މިނެޓްގައި ކާމިޔާބުކޮށްދިނީ މެންޗެސްޓާ ސިޓީގެ ޑިފެންޑަރު ޖަސްކޯ ގްވާޑިއޯލް އެވެ. އަދި އޭގެ ތިން މިނެޓް ކުރިން ވެސް ގްވާޑިއޯލް ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މިނަތީޖާއެކު ކުޅުނު ހަ މެޗުން ޕޯޗުގަލްއަށް 14 ޕޮއިންޓް ލިބިފައިވާއިރު، އެޓީމުން ކުއާޓާ ފައިނަލުގެ ޖާގަހޯދީ ގުރޫޕްގެ އެއްވަނަ ޓީމުގެ ގޮތުގައެވެ. އަދި މިމެޗުން ލިބުނު އެއް ޕޮއިންޓާއެކު ކުޅުނު ހަ މެޗުން ކްރޮއޭޝިއާއަށް އަށް ޕޮއިންޓާއެކު ގުރޫޕްގެ ދެވަނަ ލިބުނުއިރު، ތިންވަނަ ހޯދި ސްކޮޓްލޭންޑަށް ހަ މެޗުން ލިބުނީ ހަތް ޕޮއިންޓެވެ.