އާރުޓީއެލް ފެރީތެރޭގައި އަންހެނަކު ދުވަސްނުފުރާ ވިހައިފި, ކުއްޖާ ފުރާނަ ސަލާމަތެއް ނުވި!

ގދ. ވާދޫ އިން ތިނަދޫއަށް މިއަދު ދަތުރުކުރި އާރުޓީއެލް ފެރީގައި ބިދޭސީ އަންހެނަކު ދުވަސްނުފުރާ ވިހައިފި އެވެ.

ގާފު އޮންލައިންއަށް މައުލޫމާތު ލިބިފައިވާ ގޮތުގައި އެ އަންހެން މީހާ ވިހެއިއިރު ބަނޑަށް ވީ އެންމެ 17 ހަފްތާއެވެ. އަދި އެ ކުއްޖާ ވިހެއި އިރުވެސް އެކުއްޖާ ނިޔާވެފައިވާ ކަމަށް ވަނީ މައުލޫމާތު ލިބިފައެވެ. އެ އަންހެން މީހާއަކީ ގދ. ވާދޫ, ވާދޫ ޖަމާލުއްދީން ސްކޫލްގައި މަސައްކަތްކުރަމުން އަންނަ އިންޑިއާއަށް ނިސްބަތްވާ ޓީޗަރެކެވެ.

"އާރުޓީއެލް ޒޯން 5" އޮޕަރޭޝަނުން މައުލޫމާތުދިން ގޮތުގައި ގދ. ވާދޫ އިން ތިނަދޫ އަށް ދަތުރުކުރުމަށް މާބަނޑު އަންހެނަކު އައުމުން މިއަދަކީ މޫސުން ގޯސްދުވަހެއް ކަމުން ދަތުރުކުރުން އެހާ ރައްކާތެރިނޫންކަމަށް އެ އަންހެން މީހާއަށް ވަނީ ލަފާދީފައެވެ. ނަމަވެސް އެ އަންހެން މީހާ ދަތުރުކުރަން ބޭނުންވުމުން އޭނާއާ އެކު ޑޮކްޓަރަކާ ނަރުހަކަށް ދަތުރުކުރެވޭ ގޮތް އެރަށު ސިއްޙީމަރުކަޒާއި ވާހަކަދައްކައިގެން ހަމަޖައްސައި ދަތުރު ފެށިއެވެ.

ދަތުރު ފަށައިގެން 25 ވަރަކަށް މިނެޓް ފަހުން އެ އަންހެން މީހާގެ ބަނޑުގައި ގަދައަށް ރިއްސަން ފެށުމުން އެ އަންހެންމީހާއާ ހަވާލުވި ޑޮކްޓަރާއި ނަރުސް މީހާ ވަގުތުން އެހީތެރިކަން ފޯރުކޮށްދޭން ފެށިއެވެ. މާ ގިނައިރުތަކެއް ނުވެ އެއަންހެން މީހާ ވިހެއި ނަމަވެސް އެ ކުއްޖާވަނީ ނިޔާވެފައެވެ. އަދި ކުއްޖާ ނިޔާވެފައިވަނީ ދުވަސްނުފުރާ ވިހެއުމާއި ގުޅިގެން ކަމަށް ބެލެވޭ ކަމަށްވެސް މައުލުމާތު ލިބެއެވެ.

އެ އަންހެން މީހާއަށް އެހީތެރިވުމުގައި އެވަގުތު އެ ފެރީގައި ދަތުރުކުރަމުން ދިޔަ އިތުރު ދިވެހި ޑޮކްޓަރަކުވެސް ހަރަކާތްތެރިވި އެވެ. އެއީ ދާދި ފަހުން އެމްއެންޔޫ ސްކޫލް އޮފް މެޑިސިން އިން ގްރެޖުއޭޓްވި ތިނަދޫއަށް ނިސްބަތްވާ ޑޮކްޓަރެކެވެ. އެ ޑޮކްޓަރުވެސް ބަލިމީހާއަށާއި ކުއްޖާއަށް ފަރުވާ ދިނުމަށް މަސައްކަތް ކުރި ކަމަށް މައުލޫމާތު ލިބެއެވެ.

އެ އަންހެންމީހާ މިހާރު ވަނީ ތިނަދޫ ޑރ. އަބްދުއްސަމަދު މެމޯރިއަލް ހޮސްޕިޓަލަށް ގެންގޮސް ފަރުވާދޭން ފަށާފައެވެ. އަދި އެ އަންހެން މީހާގެ ހާލު ރަނގަޅު ކަމަށްވެސް މައުލޫމާތުލިބިފައިވެއެވެ.

އާރް ޓީ އެލް ގެ މުވައްޒަފުންނަކީ މިފަދަ ކަންކަމުގައި ދަތުރުވެރިންނަށް ފުރިހަމަ ރައްކާތެރިކަމާއި އެހީތެރިކަން ދިނުމަށް އަބަދުވެސް މަސައްކަތް ކުރަމުން އަންނަ ބައެކެވެ.