ނ. އަތޮޅުގައި އާރުޓީއެލް ފެރީގެ އަގުތައް އިއުލާންކޮށްފި

ނ،. އަތޮޅުގައި ފެށި ރާއްޖެ ޓްރާންސްޕޯޓް ލިންކް (އާރްޓީއެލް) ގެ ފެރީ ހިދުމަތަށް ނަގާނެ އަގުތައް ޓްރާންސްޕޯޓް މިނިސްޓްރީން އާއްމުކޮށްފި އެވެ.

އާރުޓީއެލް ފެރީގެ ހިދުމަތް ނ. އަތޮޅުގައި އިފްތިތާހުކުރީ, މިދިޔަ ބުރާސްފަތި ދުވަހު އެވެ. މިހާރު ހިލޭ ދަތުރުކުރުމުގެ ފުރުސަތު ފަހިކޮށްދީފައިވާއިރު, އަގުތައް ނަގަން ފަށާނީ އޯގަސްޓް 2ވަނަަ ދުވަހުން ފެށިގެންނެވެ.

އާރުޓީއެލް ދަތުރުތަކަށް އަގު ނަގަން ފެށުމުން ޓިކެޓް ގަންނަން ލިބޭނީ އެކަމަށް ހާއްސަކޮށްފައިވާ އާރުޓީއެލް އެޕް މެދުވެރިކޮށެވެ. ނ. އަތޮޅުގައި ފެރީގެ ހިދުމަތަށް ބޭނުން ކުރަނީ 50 މީހުންގެ ޖާގައިގެ ދެ އުޅަނދެވެ. ފެރީގެ ހިދުމަތާ އެކީ ނ. އަތޮޅުގައި މީހުން ދިރިއުޅޭ 13 ރަށް މިހާރު ވަނީ ގުޅާލެވިފަ އެވެ.

ނ. ައަތޮޅުގެ އިތުރުން އާރްޓީއެލްގެ ހިދުމަތް މިހާރު ދެމުންދަނީ ޒޯން 1 (ހއ. ހދ. އަދި ށ. އަތޮޅު)، ޒޯން 2 (ޅ. އަތޮޅު)، ޒޯން 5 (ގއ. އާއި ގދ އަތޮޅު) އަދި ޒޯން 6 ( ފުވައްމުލައް އަދި އައްޑޫ ސިޓީ) ގައެވެ.

މި ހިދުމަތް މިއަހަރުގެ އޮގަސްޓް މަހު ރ. އަތޮޅުގައި އަދި ސެޕްޓެމްބަރު މަހު ބ. އަތޮޅުގައި ފަށާނެ ކަމަށް ޓްރާންސްޕޯޓް މިނިސްޓްރީން މީގެ ކުރިން ވަނީ ބުނެފަ އެވެ.