ރެކޯޑް މޮޅަކާއެކު ޖާމަނީ ކުއާޓާ ޔަގީންކުރިއިރު، ބޮސްނިއާ ރެލިގޭޑްވެއްޖެ

ޔުއެފާ ނެޝަނަލް ލީގު ފުރަތަމަ ޑިވިޝަން ގުރޫޕް ތިނެއްގައި ރޭ އަމިއްލަ ދަނޑުގައި 7-0 ގެ ނަތީޖާއަކުން ބޮސްނިޔާ އަތުން މޮޅުވެ ޖަރުމަނުން ކުއާޓާ ފައިނަލް ޔަގީންކުރިއިރު، ބޮސްނިއާ ދެވަނަ ޑިވިޝަނަށް ރެލިގޭޓްވެއްޖެއެވެ.

މުބާރާތުގައި ޖަރުމަނު އެންމެ ފަހުން ކުޅުނު މެޗުގައި ނެދަލޭންޑްސް އަތުން 1-0 ގެ ނަތީޖާއަކުން މޮޅުވެފައިވާއިރު، ބޮސްނިއާ އެންމެ ފަހުން ކުޅުނު މެޗުގައި ހަންގޭރި އަތުން އެޓީމު ބަލިވީ 2-0 ގެ ނަތީޖާއަކުންނެވެ. އަދި މިދެޓީމު އެންމެ ފަހުން ކުޅުނު މެޗު 2-1 ގެ ނަތީޖާއަކުން ކާމިޔާބުކުރީ ޖަރުމަނެވެ.

މުޅި މެޗުގައި ވެސް މޮޅަށް ކުޅެ، ޖަރުމަނުން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ޖަރުމަނު ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި ޖަރުމަނުން އެޓީމުގެ އެޓޭކުތައް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ އިތުރު ހަތަރު ލަނޑު ކާމިޔާބުކޮށްފައެވެ.

އެގޮތުން މިމެޗުގައި ޖަރުމަނުގެ ޓިމް ކްލެއިންޑިއަންސްޓް އަދި ފްލޯރިއަން ވާޓްޒް މިއިން ކޮންމެ ކުޅުންތެރިއަކު ދެލަނޑު ކާމިޔާބުކުރިއިރު، އެޓީމުގެ ކައި ހާވާޓްޒް، ޖަމާލް މުސިއާލާ އަދި ލެރޯއީ ސާނޭ މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ. އަދި މިއީ ހަ އަހަރުވީ ޔުއެފާ ނެޝަނަލް ލީގު ތާރީޚްގައި ޓީމަކުން މޮޅުވި އެންމެ ތަފާތުބޮޑު ނަތީޖާއެވެ.

މިނަތީޖާއެކު ކުޅުން ފަސް މެޗުން ލިބުނު 13 ޕޮއިންޓާއެކު ގުރޫޕްގެ އެއްވަނަ ޓީމުގެ ގޮތުގައި ޖަރުމަނު މުބާރާތުގެ ކުއާޓާ ފައިނަލުން ޖާގަހޯދިއިރު، މިމެޗުން ބަލިވި ބޮސްނިއާ ކުޅުނު ފަސް މެޗުން ލިބުނު އެއްޕޮއިންޓާއެކު ބާކީ އެއްމެޗު އޮއްވައި އެޓީމު ވަނީ ދެވަނަ ޑިވިޝަނަށް ރެލިގޭޑްވެފައެވެ.