މިދިޔަ ހަފްތާ ބަންދުގައި އެކަނިވެސް ޕީއެންސީއަށް 8400 އަށްވުރެ ގިނަ މެމްބަރޝިޕް ފޯމް!

މިދިޔަ ހަފްތާ ބަންދުގައި ވެރިކަން ކުރާ ޕީއެންސީން އެޕާޓީގެ މެމްބަރުން އިތުރުކުރުމަށް ކުރިޔަށް ގެންދިޔަ މެމްބަރޝިޕްް ޑްރައިވްގައި އެޕާޓީއަށް އިތުރު 8000 އަށްވުރެ ގިނަ މީހުން ސޮއިކޮށްފި އެވެ.

ޕީއެންސީން މިމަހުގެ 9 ވަނަ ދުވަހުން ފެށިގެން 11 ވަނަ ދުވަހުގެ ނިޔަލަށް މާލެ ގްރޭޓާ އޭރިއާގައި ވަނީ ޚާއްސަ ބިޔަ ބޮޑު މެމްބަރޝިޕް ޑްރައިވެއް ކުރިޔަށް ގެންގޮސްފައި އެވެ. އެގޮތުން މި މެމްބަރޝިޕް ޑްރައިވްގައި އެޕާޓީގެ އިސްފަރާތްތަކުންވެސް ވަނީ ބައިވެރިވެވަޑައިގެންފައި އެވެ.

މި މެމްބަރޝިޕް ޑްރައިވްގައި އެޕާޓީއާއި ޖުމުލަ 8,400 އަށް ވުރެ ގިނަ މީހުން މެމްބަރޝިޕް ފޯމު ފުރި އިރު ރޭ ވަނީ މި ފޯމުތައް ޕާޓީގެ ލީޑަރޝިޕާއި ހަވާލުކޮށްފައި އެވެ. އެޕާޓީގެ ރަސްމީ އޮފީހުގައި ރޭ ބޭއްވި ރަސްމިއްޔާތެއްގައި މި މެމްބަރޝިޕް ޑްރައިވްގައި އިސްކޮށް ހަރަކާތްތެރިވި އެޕާޓީގެ އިސްފަރާތްތަކުން މެމްބަރޝިޕް ފޯމުތައް ހަވާލުކުރެއްވީ އެޕްާޓީގެ ޗެއާޕާސަން އަބްދުއްރަހީމް އަބްދުالله އާއި އެވެ.

ރާއްޖޭގެ އެންމެ ބޮޑު ސިޔާސީ ޕާޓީއަށް ހެދުމުގެ އަމާޒުގައި ސަރުކާރު ހިންގާ މައި ޕާޓީ، ޕީިޕަލްސް ނޭޝަނަލް ކޮންގްރެސް (ޕީއެންސީ) އިން ގިނަ މަސައްކަތްތަކެއް ކުރަމުންނެވެ. އެގޮތުން ކޮންމެ ހަފްތާ ބަންދެއްގައި އެޕާޓީން ދަނީ މެމްބަރުން އިތުރުކުރުމަށް ހަރަކާތްތައް ރާއްޖޭގެ އެކި ކަންކޮޅުތަކުގައި ކުރިޔަށް ގެންދަމުންނެވެ.