ފަސޭހަކަމާއެކު ސޯލްޓީޒް ބަލިކޮށް އޮޑި ފައިނަލުން ޖާގަ ހޯދައިފި

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ ފިރިހެން ދެވަނަ ޑިވިޝަން ސެމީފައިނަލް ފުރަތަމަ މެޗުގައި އޮޑި ސްޕޯޓްސް ކުލަބާއި ސޯލްޓީޒް ވާދަކުރި މެޗު ފަސޭހަކަމާއެކު 25-14 ނަތީޖާއަކުން މޮޅުވެ އޮޑި ފައިނަލުން ޖާގަ ހޯފައިފިއެވެ.

އޮޑި މުބާރާތުގެ ސެމީފައިނަލުން ޖާގަހޯދީ ކުއާޓާ ފައިނަލުގެ ފުރަތަމަ މެޗުގައި 19-25 ގެ ނަތީޖާއަކުން ވަކަންޑާ ސްޕޯޓްސް ކުލަބު ބަލިކުރުމަށްފަހުއެވެ. އަދި ސޯލްޓީޒް ސެމީފައިނަލުން ޖާގަހޯދީ ކުއާޓާ ފައިނަލުގެ ދެވަނަ މެޗުގައި 28-20 ގެ ނަތީޖާއަކުން ހޭންޑްބޯޅަ ވެޓަރަންސް ކުލަބު ބަލިކުރުމަށްފަހުއެވެ.

މެޗުގެ ފުރަތަމަ ހާފުގައި މޮޅަށް ކުޅެ އޮޑިން މެޗު ޑޮމިނޭޓްކުރިއިރު ފުރަތަމަ ހާފުގެ ކުޅުން ނިމިގެންދިޔައީ އަށް ލަނޑުގެ ލީޑަކާއެކު 14-6 ގެ ނަތީޖާއަކުން އޮޑި ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު 11 ލަނޑު ކާމިޔާބުކުރިއިރު، މިހާފުގައި ސޯލްޓީޒްއަށް ކާމިޔާބުކުރެވުނީ އަށް ލަނޑެވެ.

އެގޮތުން މިމެޗުގައި އޮޑީގެ ހުސެއިން އަފްޒަލް އަށް ލަނޑު ކާމިޔާބުކުރިއިރު، އެޓީމުގެ ލަހުފާން އަހުމަދު ޝަހީމް ވަނީ ހަ ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ މުހައްމަދު އަމްސާލް ތިން ލަނޑު ކާމިޔާބުކުރިއިރު، ހުސެއިން ފަހުމީ އަބްދުލް ކަރީމް، ޝުހޫދު އަހުމަދު ރިޝްފާން އަދި އަބްދުﷲ ނައިސަމް ޖަލީލް މިއިން ކޮންމެ ކުޅުންތެރިއަކު ދެލަނޑު އަދި އިސްމާއިލް އިނާން ހަމްޒާ އަދި އިއުތިމާން އަލީ މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ސޯލްޓީޒްގެ މުހައްމަދު އަލްހާން ފައިސަލް، މުހައްމަދު ދާނިޝް އަދި އިސްމާއިލް ޝަރީފް މިއިން ކޮންމެ ކުޅުންތެރިއަކު ތިން ލަނޑު ކާމިޔާބުކުރިއިރު، އެޓީމުގެ ޔުއާން ނާފިއު ވަނީ ދެލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ އިބްރާހިމް ރަޔާން، ހުސެއިން އަމަން އަދި މުހައްމަދު އަފްލާހް މިއިން ކޮންމެ ކުޅުންތެރިއަކު އެއްލަނޑު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އޮޑި ސްޕޯޓްސް ކުލަބުގެ ހުސެއިން އަފްޒަލް އެވެ.

މިއަހަރުގެ މުބާރާތުގެ ފިރިހެން ދެވަނަ ޑިވިޝަނުގައި 16 ޓީމަކުން ވާދަކުރިއިރު، މިޑިވިޝަނުގެ މެޗުތައް ގެންގޮސްފައިވަނީ ބައިވެރިވި 16 ޓީމު ހަތަރު ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމު ވަނީ ކުއާޓާ ފައިނަލަށް ހޮވިފައެވެ.