ވާދަވެރި ކުޅުމަކަށްފަހު ހިޔާ ބަލިކޮށް ފައިނަލުގެ ފަހު ޖާގަ އިސްލޭނޯއަށް

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަން ސެމީފައިނަލް ދެވަނަ މެޗުގައި އިސްލޭނޯ ސްޕޯޓްސް ކުލަބާއި ހިޔާ ސްޕޯޓްސް ކުލަބު ކުޅުނު މެޗު ވާދަވެރި ކުޅުމަކަށްފަހު 11-14 ގެ ނަތީޖާއަކުން ކާމިޔާބުކޮށް ފައިނަލްގެ ދެވަނަ ޖާގަ އިސްލޭނޯ އިން ހޯދައިފިއެވެ.

އިސްލޭނޯ މުބާރާތުގެ ސެމީފައިނަލުން ޖާގަހޯދީ ކުއާޓާ ފައިނަލުގެ ތިންވަނަ މެޗުގައި 15-14 ގެ ނަތީޖާއަކުން ކުލަބު ޔުނިޓީ އައިލެންޑާސް ބަލިކުރުމަށްފަހުއެވެ. އަދި ހިޔާ ސެމީފައިނަލުން ޖާގަހޯދީ ކުއާޓާ ފައިނަލުގެ ހަތަރުވަނަ މެޗުގައި 13-12 ގެ ނަތީޖާއަކުން ގެލަކްޓިކޯ ބަލިކުރުމަށްފަހުއެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ހަތަރު ލަނޑުގެ ލީޑަކާއެކު 9-5 ގެ ނަތީޖާއަކުން އިސްލޭނޯ ކުރީގައި އޮވެގެންނެވެ.

ނަމަވެސް ދެވަނަ ހާފުގައި ހިޔާ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގައި އިސްލޭނޯ އިން އިތުރު ފަސް ލަނޑު ކާމިޔާބުކުރިއިރު، ހިޔާ އިން މިހާފުގައި ވަނީ ހަ ލަނޑު ކާމިޔާބުކޮށްފައެވެ.

އެގޮތުން މިމެޗުގައި އިސްލޭނޯގެ އިނާޔާ ނަސީރު ހަތަރު ލަނޑު ކާމިޔާބުކުރިއިރު، އެޓީމުގެ މައީޝާ މުޖުތަބާ އަދި ފާތިމަތު ނިއުޝާ މިއިން ކޮންމެ ކުޅުންތެރިއަކު ވަނީ ތިން ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ ފާތިމަތު ތާނީ ލަތީފު، މަރިޔަމް ނިޔާޝާ، އިޝާފާ ފިރާގު އަދި މީފާ ބިންތު މަޖީދު މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ހިޔާގެ މަރިޔަމް ޝަރީފާ ހުސެއިން ހަތަރު ލަނޑު ކާމިޔާބުކުރިއިރު، އެޓީމުގެ ހައްވާ ޒާހިރާ އަދި އައިޝަތު ލައިޒާ މިއިން ކޮންމެ ކުޅުންތެރިއަކު ވަނީ ދެލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ މަރިޔަމް އަރީޝާ، ފާތުމަތު އަހުމަދު އަދި އާމިނަތު ލީނާ މިއިން ކޮންމެ ކުޅުންތެރުއަކު ވަނީ އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ އިސްލޭނޯގެ މައީޝާ މުޖުތަބާ އެވެ.

މިއަހަރުގެ މުބާރާތުގެ އަންހެން ދެވަނަ ޑިވިޝަނުގައި 26 ޓީމަކުން ވާދަކުރިއިރު، މިޑިވިޝަނުގެ މެޗުތައް ކުރިއަށް ގެންގޮސްފައިވަނީ ބައިވެރިވި 26 ޓީމު ހަ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ޓީމުގެ އިތުރުން، ހަ ގުރޫޕްގެ ދެވަނަ ހޯދި ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމަށް ވެސް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.