"ތިނަދޫ ސިޓީ ކައުންސިލް ފުޓްސަލް މުބާރާތް 2024" ގެ ފޭސް އޮފް ދަ ޓޯނަމަންޓަށް ފުރުސަތު ހުޅުވާލައިފި

ހަވަރު ސްޕޯޓްސް އިން އިންތިޒާމްކޮށް މިމަހު 24 ވަނަ ދުވަހު ފެށުމަށް ހަމަޖެހިފައިވާ "ތިނަދޫ ސިޓީ ކައުންސިލް ފުޓްސަލް މުބާރާތް 2024" ގެ ފޭސް އޮފް ދަ ޓޯނަމެންޓަށް ކުޅުންތެރިން ނޮމިނޭޓް ކުރުމުގެ ފުރުސަތު އާންމުކޮށް ހުޅުވާލައިފިއެވެ.

ހަވަރު ސްޕޯޓްސްގެ އޮފިޝަލަކު ގާފު ސްޕޯޓްސްއަށް މައުލޫމާތުދިން ގޮތުގައި "މިއީ ދުނިޔޭ އެހެން ގައުމުތަކުގައި ވެސް ވަކިން ޚާއްސަކޮށް ބޮޑެތި މުބާރާތްތަކުގައި، މުބާރާތް ޕްރޮމޯޓްކުރުމުގެ ގޮތުން ކުރާކަމެއް." ނަމަވެސް ރާއްޖޭގައި މުޅިން އަލަށް މިކަން މިކުރަނީ...

އިތުރަށް ވާހަކަދައްކަމުން އޮފިޝަލް ބުނީ މިމުބާރާތުގެ ފޭސް އޮފް ދަ ޓޯނަމެންޓެއް ކަނޑައެޅުނުގެ ބޭނުމަކީ މުބާރާތް ޕްރޮމޯޓްކޮށް އިތުރަށް ފޯރިގަދަކޮއްލުމެވެ. އަދި މީގެ އިތުރުން މިމުބާރާތުގައި ވީޑިއޯ ސަޕޯޓް ސިސްޓަމް ބޭނުންކުރުމަށް ވެސް ވަނީ ހަމަޖެހިފައެވެ.

މުބާރާތުގެ ފޭސް އޮފް ދަ ޓޯނަމެންޓަށް ނަން ހުށަހެޅުމުގެ ސުންގަޑިއަކީ 14 ނޮވެމްބަރ 2024 ވާ ބުރާސްފަތި ދުވަހުގެ ރޭ 23.59 އެވެ. އަދި ނޮމިނޭޓްވާ ކުޅުންތެރިންގެ ތެރެއިން މުބާރާތް އިންތިޒާމްކުރާ ފަރާތުން ކަނޑައަޅާފައިވާ ޝަރުތުތަކުގެ ތެރޭގައި ހިމެނޭ ފޮޓޯ އަދި ވީޓިއޯ އިންޓަވިއު ދިނުމަށް އެއްބަސްވާ ކުޅުންތެރިންގެ މެދުގައި މުބާރާތުގެ ފޭސް އޮފް ދަ ޓޯނަމެންޓް ކަޑައެޅުމަށް އާންމުކޮށް ހުޅުވާލައިގެން އޮންލައިން ވޯޓެއް ނެގުމަށް ވަނީ ހަމަޖެހިފައެވެ.

މުބާރާތުގެ ފޭސް އޮދަ ޓޯނަމެންޓަށް ނޮމިނޭޓް ކުރޭވޭ ކުޅުންތެރިންގެ ޝަރުތުތައް:

1. ތިނަދޫ ސިޓީގެ ކުޅުންތެރިއެއްކަމުގައިވުން
2. 18 އަހަރުން މަތީގެ ކުޅުންތެރިއެއްކަމުގައިވުން
3. ފާއިތުވެދިޔަ ތިން އަހަރު ތިނަދޫ ސިޓީގައި ބޭއްވެވުނު ފުޓްސަލް މުބާރާތްތަކުގައި ކުޅުނު ކުޅުންތެރިއެއްކަމުގައިވުން

މީގެ އިތުރުން މުބާރާތުގެ ފޭސް އޮދަ ޓޯނަމެންޓަށް ނޮމިނޭޓަށް ހޮވޭ ކުޅުންތެރިއަކަށް 5000 ރުފިޔާގެ ފައިސާގެ އިނާމެއް ދިނުމަށް ވަނީ ހަމަޖެހިފައެވެ.

ހަވަރު ސްޕޯޓްސް އިން އިންތިޒާމުކޮށް މުޅި ހުވަދު އަތޮޅަށް ހުޅުވާލައިގެން ބާއްވާ މިއަހަރުގެ މުބާރާތުގައި ޖުމްލަ 12 ޓީމަކުން ބައިވެރިވެފައިވާއިރު، މުބާރާތުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުންވެސް އެންމެ ރަނގަޅު ނަތީޖާއެއް ހޯދާ ދެޓީމުގެ އިތުރުން ތިން ގުރޫޕުން ތިންވަނަ ހޯދާ ޓީމުތަކުގެ ތެރެއިން އެންމެ ރަނގަޅު ނަތީޖާއެއް ހޯދާ ދެޓީމަށް ވެސް މުބާރާތުގެ ކުއާޓާ ފައިނަލުން ޖާގަ ލިބިގެންދާނެއެވެ.

ޗެންޕިއަން ޓީމަށް 50000 އަދި ރަނަރަޕް ޓީމަށް 25000 ރުފިޔާގެ ފައިސާގެ އިނާމް ހުށަހަޅާފައިވާ މި މުބާރާތުގެ ޓައިޓަލް ސްޕޮންސާއަކި ތިނަދޫ ސިޓީ ކައުންސިލް އެވެ. އަދި އެސޯސިއޭޓެޑް ޕާޓްނާއެއްގެ ގޮތުގައި އިވެންޓްކާސް މޯލްޑިވްސް ހަމަޖައްސާފައިވާއިރު، ފޮޓޯ ގްރަފީ ޕާޓްނަރަކީ ފޮޓޯ މޯލްޑިވްސް އެވެ. އަދި ބެވަރޭޖް ޕާޓްނަރަކަށް ހަތްތަރި ކެފޭ ހަމަޖައްސާފައިވާއިރު، މުބާރާތުގެ މީޑިއާ ޕާޓްނަރަކީ ގާފު ސްޕޯޓްސް އެވެ.