މިއަހަރުގެ ތިނަދޫސިޓީ ކައުންސިލް ފުޓްސަލް މުބާރާތުގައި 12 ޓީމު ވާދަކުރާނެ!

ހަވަރު ސްޕޯޓްސްއިން އިންތިޒާމްކޮށްގެން މުޅި ހުވަދު އަތޮޅަށް ހުޅުވާލައިގެން ބާއްވާ "ތިނަދޫ ސިޓީ ކައުންސިލް ފުޓްސަލް މުބާރާތް 2024" ގައި 12 ޓީމަކުން ބައިވެރިވެއްޖެ އެވެ.

ހަވަރު ސްޕޯޓްސްގެ ފަރާތުން އޮފިޝަލަކު ގާފު ސްޕޯޓްސްއަށް މައުލޫމާތު ދިންގޮތުގައި މިމުބާރާތުގައި ބައިވެރިވުމުގެ ފުރުސަތު ހުޅުވާލުމުން 14 ޓީމަކުން މުބާރާތުގައި ބައިވެރިވުމަށް އެދި ފޯމު ހުށަހެޅިއެވެ. ނަމަވެސް ޓީމު ލިސްޓް ހުށަހަޅަންޖެހޭ ސުންގަޑި އިއްޔެގެ ނިޔަލަށް ހަމަވިއިރު، ޓީމު ލިސްޓް ހުށަހަޅާފައި ވަނީ 12 ޓީމަކުންނެވެ.

މިއާއެކު މުބާރާތް ކުރިއަށް ގެންދިއުމަށް އެކުލަބުން ނިންމާފައިވަނީ، ޓީމު ލިސްޓް ހުށަހެޅި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމާގެ އިތުރުން ތިން ގުރޫޕުން ވެސް ތިންވަނަ ހޯދާ ޓީމުތަކުގެ ތެރެއިން އެންމެ ރަނގަޅު ނަތީޖައެއް ހޯދާ ދެޓީމަށް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެވެ.

ޗެންޕިއަން ޓީމަށް 50،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށައެޅިފައިވާ މިމުބާރާތުގައި ބައިވެރިވެފައިވާ 12 ޓީމުގެ ތެރޭގައި ތިނަދޫ ސިޓީގެ އަށް ޓީމުގެ އިތުރުން ގދ. މަޑަވެލި، ގއ. ކޮނޑޭ އަދި ގއ. ވިލިގިލި މިއިން ކޮންމެ ރަށަކުން ވަނީ އެއްޓީމު ބައިވެރިވެފައެވެ. އަދި މުބާރާތުގައި ވާދަކުރާ އަނެއް ޓީމަކީ ހަވޮއްޑާ ރިސޯޓްގެ ފުޓްސަލް ޓީމެވެ.

ތިނަދޫ ސިޓީ ކައުންސިލް ފުޓްސަލް މުބާރާތުގައި ބައިވެރިވި ޓީމުތައް:

1. އެންއެޗް ކަލެކްޝަން މޯލްޑިވްސް ހަވޮއްޑާ ރިސޯޓް
2. ރަޓު ޓީމު (ގދ.މަޑަވެލި)
3. މޭރީ ސްޕޯޓްސް ކުލަބު (ގއ.ވިލިގިލި)
4. ރެމްޕޭޖް (ގއ.ކޮނޑޭ)
5. ފައިޓާ ސްޕޯޓްސް ކުލަބު (ތިނަދޫ ސިޓި)
6. ޑީއާރުސީ (ތިނަދޫ ސިޓީ)
7. އައުޓްލޯޒް (ތިނަދޫ ސިޓީ)
8. އޭއެސްއެމްއެޗު-އާރުސީ (ތިނަދޫ ސިޓީ)
9. ޓީމް 401 (ތިނަދޫ ސިޓީ)
10. ފޮކްސް (ތިނަދޫ ސިޓީ)
11. ގަލެހުއްޓާ (ތިނަދޫ ސިޓީ)
12. ޔުނައިޓެޑް ނޯ ޗޮއިސް (ތިނަދޫ ސިޓި)

މީގެ އިތުރުން މި މުބާރާތުގެ ޓައިޓަލް ސްޕޮންސާއަކީ ތިނަދޫ ސިޓީ ކައުންސިލް އެވެ. އަދި އެސޯސިއޭޓެޑް ޕާޓްނާއެއްގެ ގޮތުގައި އިވެންޓްކާސް މޯލްޑިވްސް ހަމަޖައްސާފައިވާއިރު، ފޮޓޯ ގްރަފީ ޕާޓްނަރަކީ ފޮޓޯ މޯލްޑިވްސް އެވެ. އަދި ބެވަރޭޖް ޕާޓްނަރަކަށް ހަތްތަރި ކެފޭ ހަމަޖައްސާފައިވާއިރު، މީޑިއާ ޕާޓްނަރަކީ ގާފު ސްޕޯޓްސް އެވެ.