އަގްސާ ހޮސްޕިޓަލު ކައިރީގައި ތިބި ގެދޮރޮގެއްލިފައިވާ ފަލަސްތީނުގެ ރައްޔިތުންގެ ޓެންޓުތަކަށް ޔަހޫދީން ބޮން އަޅައިފި

ޣައްޒާގެ އަލް އަގްސާ ހޮސްޕިޓަލު ކައިރީގައި ތިބި ގެދޮރޮގެއްލިފައިވާ ފަލަސްތީނުގެ ރައްޔިތުންގެ ޓެންޓުތަކަށް ޔަހޫދީން ބޮން އަޅައިފި އެވެ.

އަލްޖަޒީރާގެ ނޫސްވެރިޔާ މަރަމް ހުމައިދު ރިޕޯޓުކުރާ ގޮތުގައި ޣައްޒާގެ ދީރް އަލް ބަލާހް ސިޓީގައި ހުންނަ އަލްއަޤްޞާ ހޮސްޕިޓަލުގެ ގޯތިތެރޭގައި ގެދޮރު ގެއްލިފައިވާ މީހުން ދިރިއުޅޭ ޓެންޓަކަށް ޔަހޫދީން ބޮން އަޅައި އެކަކު ވަނީ ޝަހީދުކޮށްލާފައި އެވެ. އަދި އިތުރު ތިން މީހަކަށް ސީރިއަސް ޒަހަމްތަކެއް ވެގެން އަންނަނީ ފަރުވާ ދެމުންނެވެ.

މި ހަމަލާ ދީފައިވަނީ އެ ސަރަހައްދުގައި ހުންނަ އަލްޖަޒީރާގެ ޓެންޓާ އެންމެ 20 މީޓަރު (65 ފޫޓު) ދުރުގައި ކަމަށާއި، ހަލަބޮލިކަމާއި ޒަހަމްވި މީހުން ފަރުވާ އަށް ގެންދިއުމުގެ މަންޒަރުތައް ފެނުނު ކަމަށް އަލް ޖަޒީރާގެ ނޫސްވެރިޔާ ވިދާޅުވި އެވެ.

ޔަހޫދީން ދަނީ ޣައްޒާގެ ދީރް އަލް ބަލާހް ސިޓީއަށް މިއަދު ވަރުގަދަ ހަމަލާތަކެއް ދެމުންނެވެ. އެގޮތުން މިއަދުގެ މިވަގުތާއި ހަމައަށް ޣައްޒާއިން 29 މީހަކު ޝަހީދުކޮށްލާފައިވާ ކަމަށް ރިޕޯޓުތައް ބުނެއެވެ. އޭގެ ތެރޭގައި ހަނގުރާމައިގެ ސޭފް ޒޯނެއްގެ ގޮތުގައި ކަނޑައަޅާފައިވާ އަލް މަސާވީ ރެފިއުޖީ ކޭމްޕަށްވެސް ޔަހޫދީން މިއަދު ވަނީ ހަމަލާދީފައި އެވެ.

ޔަހޫދީންގެ ހަމަލާތަކުގައި ޣައްޒާއިން ޝަހީދުވި މީހުންގެ އަދަދު ވަނީ 43,500 އަށްވުރެ މައްޗަށް ގޮސްފައި އެވެ. އަދި ޝަހީދުވި މީހުންގެ ތެރެއިން 70 އިންސައްތަ އަކީ އަންހެނުންނާއި ކުޑަކުދިން ކަމަށް އދ އިން އިއްޔެ ވަނީ ހާމަކޮށްފައެވެ.