މިއަދު އެކަނިވެސް ޣައްޒާއިން 60 އަށްވުރެ ގިނަ މީހުން ޝަހީދުވި!

ޔަހޫދީން ހުއްޓުމެއްނެތި ޣައްޒާއަށް ދެމުންދާ ހަމަލާތަކުގައި މިއަދުގެ މިވަގުތާއި ހަމައަށް ޣައްޒާއިން 60 އަށްވުރެ ގިނަ މީހުން ޝަހީދުވެއްޖެ އެވެ.

ޣައްޒާގެ ކަމާބެހޭ އިދާރާތަކާއި ހަވާލާދީ ރިޕޯޓުކުރަމުންދާ ބޭރުގެ މިޑިއާތަކުން ބުނާ ގޮތުގައި މިއަދުގެ ފަތިހުން ފެށިގެން ޔަހޫދީން ޣައްޒާއަށް ވަރުގަދަ ހަމަލާތަކެއް ވަނީ ދީފައި އެވެ. އޭގެ ތެރޭގައި އެންމެ ބޮޑު ހަމަލާތަކެއް ދީފައިވަނީ ޣައްޒާގެ ސޭފް ޒޯނެއްގެ ގޮތުގައި ކަނޑައަޅާފައިވަނީ އަލް މަސާވީ ރެފިއުޖީ ކޭމްޕަަށެވެ. އޭގެ އިތުރުން ޣައްޒާގެ އުތުރުގެ ޖަބާލިއާ ރެފިއުޖީ ކޭމްޕަށްވެސް ޔަހޫދީން ދަނީ މިއަދު ވަރުގަދަ ހަމަލާތަކެއް ވައިގެ މަގުން ދެމުންނެވެ.

މިއަދުގެ ހަމަލާތަކުގައި މިވަގުތާއި ހަމައަށް ޝަހީދުވި މީހުންގެ އަދަދު 63 އަށް އަރާފައިވާ ކަމަށް ރިޕޯޓުތައް ބުނެއެވެ. އަދި ޒަހަމްވި މީހުންގެ ތެރޭގައި ވެސް ސީރިއަސް ޒަހަމްތަކެއް ލިބިފައިވާ ފަރާތްތައް ވުމާއި އަދި ބިމާހަމަކޮށްލި އިމާރާތްތަކުގެ ދަށުގައި ވެސް ގިނަ ބަޔަކު ތިބުމުގެ ބިރު އޮތް އިރު ޝަހީދުވި މީހުންގެ އަދަދު އިތުރުވުން އެކަށީގެންވާ ކަމަށް ވެސް ރިޕޯޓުތައް ބުނެއެވެ.

އިސްރާއީލުން މިއަދު ޝަހީދުކޮށްލި މީހުންގެ ތެރޭގައި ޣައްޒާގެ ފުލުހުންގެ ޑިރެކްޓާ ޖެނެރަލް މަހްމޫދު ސަލާހު ހިމެނިވަޑައިގަންނަވައެވެ.

ޔަހޫދީން ހަމަލާތަކުގައި ފާއިތުވި 14 ވަރަކަށް މަސްދުވަހުގެ ތެރޭގައި މިހާތަނަށް ޣައްޒާއިން 45,581 މީހުން ޝަހީދުވެ 108,438 މީހުން ވަނީ ޒަހަމްވެފައި އެވެ,