ފަސޭހަކަމާއެކު ޓީރެކްސް ބަލިކޮށް ގުރޫޕްގެ އެއްވަނަ ޓީމުގެ ގޮތުގައި އޮޑި ކުއާޓާ ފައިނަލަށް

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަން ގުރޫޕް އެކެއްގައި މިރޭ ޓީރެކްސް ސްޕޯޓްސް އެކަޑަމީ (ޓީއެސްއޭ) އާއި އޮޑި ސްޕޯޓްސް ކުލަބު ކުޅުނު މެޗު ފަސޭހަކަމާއެކު 8-29 ގެ ނަތީޖާއަކުން ކާމިޔާބުކޮށް ގުރޫޕްގެ އެއްވަނަ ޓީމުގެ ގޮތުގައި އޮޑި ކުއާޓާ ފައިނަލުން ޖާގަހޯދައިފިއެވެ.

މުބާރާތުގައި ޓީއެސްއޭ ކުޅުނު ފުރަތަމަ މެޗުގައި އޮސްޕްރޭ އަތުން 13-12 ގެ ނަތީޖާއަކުން މޮޅުވިއިރު، ދެވަނަ މެޗުގައި ލަކީ ސްޕޯޓްސް ކުލަބު އަތުން 12-13 ގެ ނަތީޖާއަކުން އެޓީމު ވަނީ ބަލިވެފައެވެ. އަދި އޮޑީގެ ފުރަތަމަ މެޗުގައި ލަކީ ސްޕޯޓްސް ކުލަބު އަތުން 18-11 ގެ ނަތީޖާއަކުން މޮޅިވިއިރު، ދެވަނަ މެޗުގައި އޮސްޕްރޭ އަތުން އޮޑި މޮޅުވީ 38-8 ގެ ތަފާތުބޮޑު ނަތީޖާއަކުންނެވެ.

މުޅި މެޗުގައި ވެސް އޮޑިން މޮޅަށް ކުޅެ މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ ނުވަ ލަނޑުގެ ލީޑަކާއެކު 5-14 ގެ ނަތީޖާއަކުން އޮޑި ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު 15 ލަނޑު ކާމިޔާބުކުރިއިރު، މިހާފުގައި ޓީއެސްއޭއަށް ކާމިޔާބުކުރެވުނީ އެންމެ ތިން ލަނޑެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ލަހުފާން އަހުމަދު ޝަހީމް އެވެ.

މިނަތީޖާއެކު ކުޅުނު ތިން މެޗުން ވެސް މޮޅުވެ ގުރޫޕްގެ އެއްވަނަ ޓީމުގެ ގޮތުގައި އޮޑި ސްޕޯޓްސް ކުއާޓާ ފައިނަލުން ޖާގަހޯދިއިރު މިމެޗުން ބަލިވި ޓީއެސްއޭ ކުޅުނު ތިން މެޗުން ލިބުނު ތިން ޕޮއިންޓާއެކު އެޓީމުން މުބާރާތް ނިންމާލީ ގުރޫޕްގެ ތިންވަނައިގައި އޮވެއެވެ.

މިއަހަރުގެ މުބާރާތުގެ ފިރިހެން ދެވަނަ ޑިވިޝަނުގައި 16ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 16ޓީމު ހަތަރު ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެއެވެ.