ފަސޭހަކަމާއެކު އެސްޖީސީ ބަލިކޮށް އޮރިކްސް އިން ފައިނަލްގެ ޖާގައެއް ކަށަވަރުކޮށްފި

ގައުމީ ހޭންޑްބޯޅަ މުބާރާތުގެ އަންހެން ފުރަތަމަ ޑިވިޝަންގައި މިރޭ އޮރިކްސް އާއި ސުޕަރ ޖެނަރޭޝަން ކުލަބު (އެސްޖީސީ) ކުޅުނު މެޗު ފަސޭހަކަމާއެކު 33-14 ގެ ތަފާތުބޮޑު ނަތީޖާއަކުން ކާމިޔާބުކޮށް އޮރިކްސް އިން މުބާރާތުގެ ފައިނަލުގެ ޖާގައެއް ކަށްވަރުކޮށްފިއެވެ.

މުބާރާތުގައި އޮރިކްސް ކުޅުނު ފުރަތަމަ މެޗުގައި 37-15 ގެ ނަތީޖާއަކުން އެސްޖީސީ އަތުން މޮޅުވިއިރު، ދެވަނަ މެޗުގައި 20-17 ގެ ނަތީޖާއަކުން އެޓީމުން ވަނީ ރެޑްހޯކްސް ބަލިކޮށްފައެވެ. ނަމަވެސް ރެޑްހޯކްސް އާއި ދެކޮޅަށް ކުޅުނު ދެވަނަ މެޗުން 30-24 ގެ ނަތީޖާއަކުން އެޓީމު ވަނީ ބަލިވެފައެވެ.

މީގެ އިތުރުން މުބާރާތުގައި އެސްޖީސީ ކުޅުނު ފުރަތަމަ މެޗުގައި 35-25 ގެ ނަތީޖާއަކުން ރެޑްހޯކްސް އަތުން ބަލިވިއިރު، ދެވަނަ މެޗުގައި އޮރިކްސް އަތުން އެޓީމު ބަލިވީ 15-37 ގެ ނަތީޖާއަކުންމެވެ. އަދި މިއީ އެޓީމުން މުބާރާތުގައި ކުޅުނު ތިންވަނަ މެޗެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއްް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ތިން ލަނޑުގެ ލީޑަކާއެކު 6-9 ގެ ނަތީޖާއަކުން އޮރިކްސް ކުރީގައި އޮވެގެންނެވެ. އަދި ދެވަނަ ހާފުގައި އޮރިކްސް އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ.

ނަތީޖާއެއްގެ ގޮތުން ދެވަނަ ހާފުގައި އެޓީމުން އިތުރު 24 ލަނޑު ކާމިޔާބުކުރިއިރު މިހާފުގައި އެސްޖީސީއަށް ކާމިޔާބުކުރެވުނީ އެންމެ އަށް ލަނޑެވެ.އަދި މިމެޗުގެ މޮޅު ކުޅުންތެރިއަކަށް ހޮވުނީ އޮރިކްސްގެ ޒުލޭޚާ އިބްރާހިމް އެވެ. އޭނާ ވަނީ މިމެޗުގައި އެޓީމަށް ހަ ލަނޑު ކާމިޔާބުކޮށްދީފައެވެ.

މިނަތީޖާއެކު ކުޅުނު ހަތަރު މެޗުން އޮރިކްސްއަށް ނުވަ ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ބުރުގެ އެއްވަނައިގައެވެ. އަދި މިމެޗުން ބަލިވި އެސްޖީސީ ކުޅުނު ތިން މެޗުން ވެސް ބަލިވެފައިވާއިރު، ބާކީ އެއްމެޗު އޮއްވައި އެޓީމު ވަނީ މުބާރާތުން ކަޓާފައެވެ.

މިއަހަރުގެ މުބާރާތުގެ އަންހެން ފުރަތަމަ ޑިވިޝަނުގައި ތިން ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި ތިން ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި ދެމެޗު ކުޅެ އެންމެ ރަނގަޅު ނަތީޖާއެއް ހޯދާ ދެޓީ ފައިނަލަށް ހޮވޭގޮތަށެވެ.