ލުބުނާނުން ފޮނުވާލި ރޮކެޓެއް އިޒްރޭލުގެ މައި އެއާޕޯޓާއި ކައިރި ސަރަހައްދަކަށް ވެއްޓިއްޖެ

ލުބުނާނުން އިޒްރޭލުގެ އަމާޒުތަކަށް އަމާޒުކޮށް ފޮނުވާލި ރޮކެޓެއް އިޒްރޭލުގެ މައި އެއާޕޯޓާއި ކައިރި ސަރަހައްދަކަށް ވެއްޓިފައިވާ ކަމަށް ރިޕޯޓުތައް ބުނެފި އެވެ.

އިޒްރޭލުގެ އަސްކަރިއްޔާއިން ބުނީ ލުބުނާނުން އިސްރާއީލުގެ މެދުތެރެއާއި އުތުރުގެ ސަރަހައްދުތަކަށް އަމާޒުކޮށް 10 ރޮކެޓް ފޮނުވާލާފައިވާ ކަމަށެވެ.

އަދި ބައެއް ޕްރޮޖެކްޓަލްތައް ހުއްޓުވާފައިވާ ކަމަށާއި، ނަމަވެސް ދެތިން ރޮކެޓް އެގައުމުގެ މެދުތެރޭގެ ސަރަހައްދުތަކަކަށް ވެއްޓިފައިވާ ކަމަށް ޔަހޫދީ އަސްކަރިއްްޔާއިން ވަނީ ބުނެފައި އެވެ. ނަމަވެސް ވެއްޓުނީ ކޮން ސަރަހައްދަކަކަށް ކަމެއް ހާމަކޮށްފައެއް ނުވެއެވެ.

އިޒްރޭލު އަސްކަރިއްޔާއިން މިފަދަ ބަޔާނެއް ނެރުމުގެ އިރުކޮޅެއް ކުރިން ޓައިމްސް އޮފް އިޒްރޭލުން ވަނީ ތެލްއަވީވްގެ ބެން ގުރިއަން އެއާޕޯޓު ކައިރީގައި ބާރުގަދަ ގޮވުމެއްގެ އަޑު އިވިފައިވާކަމަށް ރިޕޯޓުކޮށްފައެވެ. އަދި ޔަހޫދީންގެ އެހެނިހެން މީޑިއާތަކުން ރިޕޯޓުކުރާގޮތުގައި އެއީ ލުބުނާނުން ދިން ރޮކެޓު ހަމަލާއެއްގެ އަޑުތަކެއްކަން ވަނީ ކަށަވަރުވެފައި އެވެ.

މި ހަމަލާގައި އެއްވެސް މީހަކަށް ގެއްލުމެއް ލިބިފައި ނުވާ ކަމަށް ޔަހޫދީ އަސްކަރިއްޔާއިން ބުނެއެވެ.

މި ހަމަލާގެ ޒިންމާ އަދި މިހާތަނަށް އެއްވެސް ބަޔަކު ނަގާފައި ނުވާއިރު މި ހަމަލާގެ ފަހަތުގައި ވަނީ ހިޒްބުالله ކަމަށް އިޒްރޭލުގެ މީޑިއާތަކުން ތުހުމަތު ކުރެއެވެ.