އެމެރިކާގެ ރައީސް ކަމަށް ދެވަނަ ދައުރަކަށް ޓްރަމްޕު!

އެމެރިކާގައި އިއްޔެ ކުރިޔަށް ގެންދިޔަ ރިޔާސީ އިންތިހާބު އެގައުމުގެ ކުރީގެ ރައީސް ޑޮނަލްޑް ޓްރަމްޕު ކާމިޔާބުކުރައްވައިފި އެވެ.

އިންތިހާބުގެ ރަސްމީ ނަތީޖާ އަދި މިހާތަނަށް އިއުލާނުކޮށްފައި ނުވި ނަމަވެސް ޕްރޮޖެކްޝަންތައް ދައްކާގޮތުންނާއި އެގްސިޓް ޕޯލްތަކުން މި އިންތިހާބު ޓްރަމްޕު ކާމިޔާބުުރެއްވިކަން ވަނީ ކަށަވަރުވެފައި އެވެ. މިއާއި އެކު މީގެ ގަޑިއިރެއްހާއިރު ކުރިން ޓްރަމްޕު ވަނީ އިންތިހާބު ކާމިޔާބުކުރެވުނު ކަން ރަސްމީކޮށް އިއުލާނުކުރައްވާފައި އެވެ.

ޓްރަމްޕަށް އިންތިހާބު ކާމިޔާބުކުރެވުނު ކަން ކަށަވަރުވެގެން ގޮސްފައިވަނީ އެމެރިކާގެ އިންތިހާބުތަކުގައި އެންމެ ބޮޑު ރޯލެއް އަދާކުރާ ޕެންސިލްވޭނިއާ، ނޯތު ކެރޮލައިނާ އަދި ޖޯޖިއާ ފަދަ މުހިންމުސްޓޭޓްތައް ކާމިޔާބު ކުރާނެ ކަމަށް ޕްރޮޖެކްޝަންތައް ދެއްކުމާއި އެކުގައި އެވެ.

ރިޕޯޓުތައް ބުނާގޮތުގައި އިންތިހާބުގައި ޓްރަމްޕަށް 51 އިންސައްތަ ކާމިޔާބުކުރެވުނުކަން މިހާރު ވަނީ ޔަގީން ވެފައި އެވެ.

އިންތިހާބުގައި ޓްރަމްޕާއި ވާދަކުރީ އެގައުމުގެ މިހާރުގެ ނައިބު ރައީސް އަދި ޑިމޮކްރެޓިކްގެ ކެނޑިޑޭޓު ކަމަލާ ހެރިސްއާއި އެވެ. އިންތިހާބުގެ ނަތީޖާ ދައްކާ ގޮތުގައި މިހާތަނަށް އައިއިރު، ޓްރަމްޕަށް ވަނީ 267 އިލެކްޓޯރަލް ވޯޓު ހޯދައިފައެވެ. ކަމަލާއަށް ލިބުނީ 214 އިލެކްޓޯރަލް ވޯޓެވެ. ޓްރަމްޕް ވަނީ މިހާތަނަށް އައިއިރު، 68 މިލިއަން ވޯޓު ހޯދައިފައެވެ. ކަމަލާ އަށް ލިބުނީ 63 މިލިއަން ވޯޓެވެ.

މިއީ އެމެރިކާގެ ވެރިކަން ޓްރަމްޕު ހޯދި ދެވަނަ ފަހަރެވެ. ބައިޑެން މިހާރު ކުރައްވަމުން ގެންދަވާ ވެރިކަމުގެ ކުރިން ޓަރަމްޕު ވަނީ އެގައުމުގެ ވެރިކަން އެއް ދައުރަށް ކުރައްވާފައި އެވެ.