ޒައިރޯ އަތުން ބަލިވެ ބާކީ އެއްމެޗު އޮއްވައި ފުލިދޫ މުބާރާތުން ކަޓައިފި

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަން ގުރޫޕް ދޭއްގައި ޒައިރޯ އަތުން 12-11 ގެ ނަތީޖާއަކުން ބަލިވެ، ބާކީ އެއްމެޗު އޮއްވައި ފުލިދޫ މުބާރާތުން ކަޓައިފިއެވެ.

މުބާރާތުގައި ޒައިރޯ ކުޅުނު ފުރަތަމަ މެޗުގައި އަސްދިޤާއި ވާދަކޮށް 11-11 ގެ ނަތީޖާއަކުން ދެޓީމު އެއްވަރުވެފައިވާއިރު، ފުލިދޫގެ ފުރަތަމަ މެޗުގައި ވެސްޓް އެންޑް އަތުން އެޓީމު ބަލިވީ 3-34 ގެ ތަފާތުބޮޑު ނަތީޖާއަކުން ނެވެ.

މިމެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ އެއް ލަނޑުގެ ލީޑަކާއެކު 5-6 ގެ ނަތީޖާއަކުން ފުލިދޫ ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު ފަސް ލަނޑު ކާމިޔާބުކުރިއިރު، މިހާފުގައި ޒައިރޯއަށް ކާމިޔާބުކުރެވުނީ ހަ ލަނޑެވެ.

އެގޮތުން މިމެޗުގައި ޒައިރޯގެ އައިޝަތު މައިހާ އަބްދުލް ރަޝީދު ފަސް ލަނޑު ކާމިޔާބުކުރިއިރު, އެ ޓީމުގެ ހަފީޒާ އިބްރާހިމް ވަނީ ހަތަރު ލަނޑު ކާމިޔާބުކޮށްދީފައެވެ. އަދި މީގެ އިތުރުން އެޓީމުގެ އަލްޔާ އުބައިދުالله އިދްރީސް ދެ ލަނޑު ކާމިޔާބުކުރިއިރު, އެ ޓީމުގެ އައިޝަތު ލޫނާ ޙަލީލް ވަނީ އެއް ލަނޑު ކާމިޔާބުކޮށްދީފައެވެ.

މީގެ އިތުރުން މިމެޗުގައި ފުލިދޫގެ ފާތުމަތު އަރީޝާ ހަތަރު ލަނޑު ކާމިޔާބުކުރިއިރު، އެޓީމުގެ ފާތިމަތު ޔަހުޔާ އަދި އައިޝަތު އުލްޔާ އާދަމް މިއިން ކޮންމެ ކުޅުންތެރިއަކު ވަނީ ދެލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ ޖުވައިރިއްޔާ މުހައްމަދު، ސަމިއްޔާ އަލީ އަދި ފާތިމަތު ރަމްޒާ އަލީ، މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޒައިރޯގެ ހަފީޒާ އިބްރާހިމް އެވެ.

މިނަތީޖާއެކު ކުޅުނު ދެމެޗުން ޒައިރޯއަށް ހަތަރު ޕޮއިންޓް ލިބިފައިވާއިރު، މިމެޗުން ބަލިވި ފުލިދޫ ކުޅުނު ދެމެޗުން ވެސް އެޓީމު ވަނީ ބަލިވެފައެވެ. އަދި އެޓީމު މިވަގުތު އޮތީ ލީގުތާވަލުގެ ފުލުގައެވެ.

މިއަހަރުގެ މުބާރާތުގެ އަންހެން ދެވަނަ ޑިވިޝަނުގައި 26 ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 26 ޓީމު ހަ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ޓީމުގެ އިތުރުން ،ހަ ގުރޫޕްގެ ދެވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމަށް ވެސް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެއެވެ.