ހިޒްބުالله ގެ ހަމަލާއެއް އިޒްރޭލުގެ ތެލް އަވީވް އާއި ހައިފާގެ އަސްކަރީ މަރުކަޒުތަކަކަށް!

ހިޒްބުالله އިން އިޒްރޭލުގެ ތެލް އަވީވް އާއި ހައިފާއަށް ޑްރޯން ހަމަލާތަކެއް ދީފި އެވެ.

ހިޒްބުالله އިން ބުނެފައިވަނީ ތެލްއަވީވްގެ ދެކުނު ސަރަހައްދުގައި ހުންނަ އިޒްރޭލުގެ "ޕަލްމަޗިމް' އަސްކަރީ ވައިގެ މަރުކަޒަށް ޑްރޯން ހަމަލާތަކެއް ދީފައިވާ ކަމަށެވެ.

އެ ޖަމާއަތުން ބުނީއެ ބޭސްގައި އަސްކަރީ ރިސާޗް ސެންޓަރަކާއި ހަތިޔާރު ސިސްޓަމަށް ބޭނުންކުރާ ރާޑަރެއް ގާއިމް ކޮށްފައިވާ ކަމަށެވެ.

މީގެ އިތުރުންވެސް ހިޒްބުالله އިން ވަނީ ހައިފާގެ އުތުރުން އޮންނަ ޒެވުލޯން އަސްކަރީ މަރުކަޒަށް މިސައިލް ހަމަލާ ދީފައެވެ. އަދި ހައިފާގެ އުތުރުގައި އޮންނަ ކްރަޔޯތުގެ ސަރަހައްދަށްވެސް ރޮކެޓް ހަމަލާތަކެއް ދީފައިވާ ކަމަށް އެ ޖަމާއަތުން ބުނެފައިވެއެވެ.

މިހަމަލާތަކާ ގުޅިގެން އިޒުރޭލުން އަދި ވަކި އެއްޗެއް ބުނެފައެއް ނުވެއެވެ.