ވާދަވެރި ކުޅުމަކަށްފަހު ވަކަންޑާ އިން ބޮންތި ބަލިކޮށްފި

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ ފިރިހެން ދެވަނަ ޑިވިޝަން ގުރޫޕް ތިނެއްގައި ވަކަންޑާ ސްޕޯޓްސް ކްލާބްއާއި ބޮންތި ކުޅުނުމެޗު ވާދަވެރި ކުޅުމަކަށްފަހު 19-22 ގެ ނަތީޖާއަކުން ވަކަންޑާ ކާމިޔާބުކޮށްފިއެވެ.

މުބާރާތުގައި ވަކަންޑާ ކުޅުނު ފުރަތަމަ މެޗުގައި ބުރު ސްޕޯޓްސް ކްލަބާ ވާދަކޮށް 21-18 އަކުން ބަލިވެފައިވާއިރު, ބޮންތިވެސް ފުރަތަމަ މެޗުގައި އައިލެންޑާސް އާއި ވާދަކޮށް ވަނީ 22-18 ގެ ނަތީޖާއަކުން ބަލިވެފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު, ފުރަތަމަ ހާފުގެ ކުޅުން ނިމިގެން ދިޔައީ 9-9 ގެ ނަތީޖާއަކުން ދެ ޓީމް އެއްވަރު ވެގެންނެވެ. އަދި ދެވަނަ ހާފުގައި ވަކަންޑާ އިން އިތުރު 13 ލަނޑު ކާމިޔާބުކުރިއިރު، ބޮންތި ވެސް ވަނީ އިތުރު 10 ލަނޑު ކާމިޔާބުކޮށްފައެވެ.

އެގޮތުން މިމެޗުގައި ވަކަންޑާގެ މުހައްމަދު ހުބާބު އިސްމައިލް ރިޒާ ހަ ލަނޑު ކާމިޔާބުކޮށްފައިވާއިރު, އެޓީމުގެ އަހުމަދު ޒައީމް ވަނީ ފަސް ލަނޑު ކާމިޔާބުކޮށްދީފައެވެ. އަދި އެޓީމުގެ ތަހުސީން އަހުސަން ހަތަރު ލަނޑު ކާމިޔާބުކޮށްދީފައިވާއިރު, ޒަހުވާން މުހައްމަދު ހާޝިމް ވަނީ ތިން ލަނޑު ކާމިޔާބުކޮށްދީފައެވެ. މީގެ އިތުރުން މި ޓީމުގެ މުހައްމަދު ޒަކްވާން ސަމީލް ދެލަނޑު ކާމިޔާބުކޮށްދީފައިވާއިރު، އަހުމަދު އަބްދުލް ސައްތާރު، ލުގުމާން ރަޝީދު މިއިން ކޮންމެ ކުޅުންތެރިޔަކު ވަނީ އެއް ލަނޑު ކާމިޔާބުކޮށްދީފައެވެ.

މީގެ އިތުރުން ބޮންތީގެ ޝައިހާން ޝްއުކަތު, އިބްރާހިމް އަލްތާފް ހާފިޒު, ފިރުޝާން މުހައްމަދު މިއިން ކޮންމެ ކުޅުންތެރިޔަކު ހަތަރު ލަނޑު ކާމިޔާބުކުރިއިރު, ނަސާތު ނަސީމް, އަހުމަދު ވަފާދު ހިލްމީ, ޒައިދް މުހައްމަދު ތައުފީގް މިއިން ކޮންމެ ކުޅުންތެރިޔަކު ވަނީ ދެ ލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑު ކާމިޔާބުކޮށްދީފައިވަނީ މުހައްމަދު އައިމަން އަހުމަދު ޝިޔާމުއެވެ. އަދި މިމެޗުގެ މޮޅުކުޅުންތެރިޔަކަށް ހޮވިފައިވަނީ ވަކަންޑާގެ ނިސްފާދު އަލީއެވެ.

މިއަހަރުގެ މުބާރާތުގެ ފިރިހެން ދެވަނަ ޑިވިޝަނުގައި 16ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 16ޓީމު ހަތަރު ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެއެވެ.