17 އަހަރުންދަށުގެ ފިރިހެން: ފަހަތުން އަރައި ޖަމާލުއްދީން ބަލިކޮށް އަހުމަދިއްޔާ ޗެންޕިއަންކަން ހޯދައިފި

މިހާރު ކުރިއަށްދާ 7ވަނަ އިންޓަރ ސްކޫލް ހޭންޑްބޯޅަ މުބާރާތުގެ 17 އަހަރުންދަށުގެ ފިރިހެން ފައިނަލް މެޗުގައި އަހުމަދިއްޔާ އިންޓަނޭޝަނަލް ސްކޫލާއި ޖަމާލުއްދީން ސްކޫލް ވާދަކުރި މެޗު 22-18 ނަތީޖާއަކުން ކާމިޔާބުކޮށް އަހުމަދިއްޔާ އިން މުބާރާތުގެ ޗެންޕިއަންކަން ހޯދައިފިއެވެ.

ޖަމާލުއްދީ ފައިނަލުން ޖާގަ ހޯދީ ސެމީފައިނަލް ފުރަތަމަ މެޗުގައި ވާދަވެރި ކުޅުމަކަށްފަހު 20-21 ގެ ނަތީޖާއަކުން ތާޖުއްދީން ސްކޫލް ބަލިކުރުމަށްފަހު އެވެ. އަދި އަހުމަދިއްޔާ ފައިނަލުން ޖާގަ ހޯދީ ސެމީ ފައިނަލް ދެވަނަ މެޗުގައި ވާދަވެރި ކުޅުމަކަށްފަހު 22-21 ނަތީޖާއަކުން އަމީނިއްޔާ ސްކޫލް ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ އެއްލަނޑުގެ ލީޑަކާއެކު 9-10 ގެ ނަތީޖާއަކުން ޖަމާލުއްދީން ސްކޫލް ކުރީގައި އޮވެގެނެވެ. އަދި މެޗުގެ ދެވަނަ ހާފުގައި އަހުމަދިއްޔާ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ.

ނަތީޖާއެއްގެ ގޮތުން ދެވަނަ ހާފުގައި އެޓީމުން އިތުރު 13 ލަނޑު ކާމިޔާބުކުރިއިރު، މިހާފުގައި ޖަމާލުއްދީން ސްކޫލައް ކާމިޔާބުކުރެވުނީ އިތުރު ނުވަ ލަނޑެވެ.

އެގޮތުން މިމެޗުގައި އަހުމަދިއްޔާ ސްކޫލްގެ މުހައްމަދު ތައުންމު ތަސްނީމް އަދި މުހައްމަދު އަފްކަލް އަސްލަމް މިއިން ކޮންމެ ކުޅުންތެރިއަކު ހަ ލަނޑު ކާމިޔާބުކުރިއިރު އެޓީމުގެ އަމްމާރު ބިން މުސްތަފާ ފަސް ލަނޑު އަދި މުހައްމަދިު ޝަމާލް ޝިޔާމް ވަނީ ތިން ލަނޑު ކާމިޔާބުކޮށްފައެވެ. އަދި އެޓީމުގެ އަނެއް ދެލަނޑު ކާމިޔާބުކޮށްދިނީ އަހުމަދު ފަރޫހް ފުރާގް އެވެ.

މީގެ އިތުރުން މިމެޗުގައި ޖާމާލުއްދީން ސްކޫލްގެ މުހައްމަދު އަފްލާހު ހުސެއިން ސިފާޒް އަށް ލަނޑު ކާމިޔާބުކުރިއިރު، އެޓީމުގެ އަލްހާން ފައިސަލް އަމީން ވަނީ ހަތަރު ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ އިނާން ތޮލްއަތު މުހައްމަދު، ޔޫސުފް މައީޝް މުސްފަތާ އަދި އައުފް އަބްދުއް ރަހުމާން އާރިފް މިއިން ކޮންމެ ކުޅުންތެރިއަކު ދެލަނޑު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އަހުމަދިއްޔާ އިންޓަނޭޝަނަލް ސްކޫލްގެ ކީޕަރު އާނަންދު ބީނު އެވެ

މިއަހަރުގެ އިންޓަރ ސްކޫލް ހޭންޑްބޯޅަ މުބާރާތުގެ 17 އަހަރުން ދަށުގެ ފިރިހެން ޑިވިޝަނުގައި ޖުމްލަ 16 ޓީމަކުން ވާދަކޮށްފައިވާއިރު، މިޑިވިޝަންގެ މެޗުތައް ކުރިއަށް ގެންގޮސްފައިވަނީ ބައިވެރިވި 16 ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެ ޓީމަށް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.