ގައުމީ ބީޗު ހޭންޑްބޯޅަ ޓީމަށް ޕާކިސްތާނުގެ ތަޖުރިބާކާރު ކޯޗެއް

2025 ފެބުރުއަރީ 17 އިން 23 އަށް ޕާކިސްތާންގެ ކަރާޗީގައި އޮންނަ ކޮމަންވެލްތު ގޭމްގައި ވާދަކުރުމަށް އެކުލަވާލާ ޤައުމީ ބީޗް ހޭންޑްބޯޅަ ޓީމުގެ ކޯޗަކަށް ޕާކިސްތާންގެ ތަޖުރިބާކާރު ކޯޗެއް ކަމަށްވާ އާސިމް ރާޝިދު ހަމަޖައްސައިފިއެވެ.

ހޭންޑްބޯޅަ މޯލްޑިވްސްގެ ރައީސް އަހުމަދު މުޖުތަބާ ގާފު ސްޕޯޓްސްއަށް މައުލޫމާތު ދެއްވިގޮތުގައި އާސިމް ރާޝިދު އަކީ ޕާކިސްތާން ޤައުމީ ބީޗު ހޭންޑްބޯޅަ ޓީމާއެކު އޭޝިއަން ގޭސް ބީޗު ހޭންޑްބޯޅައިން ބްރައުންޒް، ސިލްވާ މެޑަލް އަދި ދެފަހަރު ގޯލްޑް މެޑަލް ހޯދާފައިވާ ވަރަށް ތަޖުރިބާކާރު ކޯޗެކެވެ. އަދި މީގެ އިތުރުން އާސިމް އަކީ އައިއެޗްއެފްގެ މުބާރާތްތަކުގައި ޓެކްނިކަލް ޑެލިގޭޓެއްގެ ގޮތުގައި މަސައްކަތް ކުރަމުން އަންނަ ފަރާތެކެެވެ.

އިތުރަށް ވާހަކަ ދައްކަމުން މުޖުތަބާ ވިދާޅުވީ ކޯޗު މިހާރު ވަނީ ރާއްޖެ އައިސް މަސައްކަތް ފަށާފައެވެ. އެގޮތުން 38 ކުޅުންތެރިންނާއެކު ގައުމީ ބީޗް ހޭންބޯޅަ ސްކޮޑު އެކުލަވާލުމުގެ މަސައްކަތް މިމަހުގެ 15 އިން ފެށިގެން ކުޅުދުއްފުށި ސިޓީގައި ކުރިއަށްދާކަމަށެވެ.

ގައުމީ ޓީމު ޕްރެކްޓިސްގައި ބައިވެރިވުމުގެ ފުރުސަތު ހުޅުވާލުމުން 44 ކުޅުންތެރިއަކު ބައިވެރިވުމަށް އެދި ފޯމް ހުށަހެޅި ނަމަވެސް އެކި ސަބަބުތަކާއި ހުރެ ފަރިތަކުރުންތަކުގައި ބައިވެރިވަމުން އަންނަނީ 38 ކުޅުންތެރިންނެވެ.

އޭގެތެރޭގައި ހިމެނެނީ ކުޅުދުއްފުށިން ބައިވެރިވި 31 ކުޅުންތެރިންނާއި ރާއްޖޭގެ އެކި ރަށްރަށުން ބައިވެރިވި ހަތް ކުޅުންތެރިންނެވެ. އަދި މިކުޅުންތެރިންނާއިއެކު 10 ދުވަސް ވަަންދެން ދުވާލަކު ދެއިރު ޕްރެކްޓިސް ކުރުމަށްފަހު 16 ކުޅުންތެރިންގެ ސްކޮޑެއް އެކުލަވާލުމަށް ވަނީ ހަމަޖެހިފައެވެ. އަދި ކޮމަންވެލްތް ގޭމްގައި ވާދަކުރާ ގައުމީ ޓީމު ފައިނަލް ފައިނަލް ކުރުމަށް ހަމަޖެހިފައިވަނީ 2025 ފެބުރުއަރީ 10 ގެ ފަހުންނެވެ.