17 އަހަރުންދަށް އަންހެން: އާޝާގެ 10 ލަނޑާއެކު ހަމަދު ސްކޫލް ބަލިކޮށް އއ.އޭއީސީ ޗެންޕިއަންކަން ހޯދައިފި

މިހާރު ކުރިއަށްދާ 7ވަނަ އިންޓަރ ސްކޫލް ހޭންޑްބޯޅަ މުބާރާތުގެ 17 އަހަރުންދަށުގެ އަންހެން ފައިނަލް މެޗުގައި ހަމަދު ސްކޫލާއި އއ. އަތޮޅު ތައުލީމީ މަރުކަޒް (އއ.އޭއީސީ) ވާދަކުރި މެޗު 23-15 ގެ ނަތީޖާއަކުން ކާމިޔާބުކޮށް އއ.އޭއީސީ މުބާރާތުގެ ޗެންޕިއަންކަން ހޯދައިފިއެވެ.

އއ.އޭއީސީ މުބާރާތުގެ ފައިނަލުން ޖާގަ ހޯދީ ސެމީފައިނަލް ފުރަތަމަ މެޗުގައި 20-14 ގެ ނަތީޖާއަކުން އަހުމަދިއްޔާ އިންޓަނޭޝަނަލް ބަލިކުރުމަށްފަހުއެވެ. އަދި ހަމަދު ސްކޫލް ސެމީފައިނަލުން ޖާގަ ހޯދީ ސެމީ ފައިނަލް ދެވަނަ މެޗުގައި 19-21 ނަތީޖާއަކުން ޣާޒީ ސްކޫލް ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ފޯރިގަދަ އަވަސް ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 10-10 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

ނަމަވެސް މެޗުގެ ދެވަނަ ހާފުގައި އއ.އޭއީސީ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގައި އެޓީމުން އިތުރު 13 ލަނޑު ކާމިޔާބުކުރިއިރު، މިހާފުގައި ހަމަދު ސްކޫލަށް ކާމިޔާބުކުރެވުނީ އިތުރު ފަސް ލަނޑެވެ.

އެގޮތުން މިމެޗުގައި އއ.އޭއީސީގެ ފާތިމަތު އާޝާ ރަޝީދު 10 ލަނޑު ކާމިޔާބުކުރިއިރު، އެޓީމުގެ ހައްވާ މިލްހަނާ މުހައްމަދު މާހިރު ހަ ލަނޑު އަދި އައިޝަތު ރުހާ އިލްހާމް ވަނީ ހަތަރު ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ އައިޝަތު މިދުހާ ހާތިމް ދެލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ މަރިޔަމް މިޝްޔާ މުހައްމަދު އެވެ.

މީގެ އިތުރުންް މިމެޗުގައި ހަމަދު ސްކޫލްގެ ތޫބާ ބިންތް އަހުމަދު ހަ ލަނޑު ކާމިޔާބުކުރިއިރު، އެޓީމުގެ އާމިނަތު ސާއީ އަލީ ޝަމީމް ހަތަރު ލަނޑު އަދި އައިޝަތު ޔަޝްކާ ޔޫސުފް ވަނީ ދެލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ ނައުފާ ޒާހިރު، އައިޝަތު ސަނާ އަދި އައިޝަތް އަފާފް އާދިލް މިއިން ކޮންމެ ކުޅުންތެރިއަކު އެއްލަނޑު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އއ.އޭއީސީގެ ހައްވާ މިލްހަނާ މުހައްމަދު މާހިރު އެވެ.

މިއަހަރުގެ އިންޓަރ ސްކޫލް ހޭންޑްބޯޅަ މުބާރާތުގެ 17 އަހަރުން ދަށުގެ އަންހެން ޑިވިޝަނުގައި ޖުމްލަ 23 ޓީމަކުން ވާދަކޮށްފައިވާއިރު، މިޑިވިޝަންގެ މެޗުތައް ކުރިއަށް ގެންގޮސްފައިވަނީ ބައިވެރިވި 23 ޓީމު ފަސް ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ޓީމުގެ އިތުރުން ފަސް ގުރޫޕުން ދެވަނަ ހޯދި ޓީމުތަކުގެ ތެރެއިން އެންމެ ނަތީޖާ ރަނގަޅު ތިން ޓީމަށް ވެސް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.