އޮސްޕްރޭ އަތުން މޮޅުވެ، ގުރޫޕްގެ އެއްވަނަ އޮޑިއަށް

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ ފިރިހެން ދެވަނަ ޑިވިޝަން ގުރޫޕް އެކެއްގައި އޮޑި އަދި އޮސްޕްރޭ ކުޅުނު މެޗު ފަސޭހަކަމާއެކު 38-8 ގެ ތަފާތުބޮޑު ނަތީޖާއަކުން އޮޑި ކާމިޔާބުކޮށްފިއެވެ.

މުބާރާތުގައި އޮޑި ކުޅުނު ފުރަތަމަ މެޗު ލަކީ އާއި ވާދަކޮށް 11-18 ނަތީޖާއަކުން މޮޅުވެފައިވާއިރު، އޮސްޕްރޭގެ ފުރަތަމަ މެޗުގައި ވާދަވެރި ކުޅުމަކަށްފަހު ޓީއެސްއޭ އަތުން އެޓީމު ބަލިވީ 12-13 ގެ ނަތީޖާ އަކުންނެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 11 ލަނޑުގެ ލީޑަކާއެކު 16-5 ގެ ނަތީޖާއަކުން އޮޑި ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު 22 ލަނޑު ކާމިޔާބުކުރިއިރު، މިހާފުގައި އޮސްޕްރޭއަށް ކާމިޔާބުކުރެވުނީ އެންމެ ތިން ލަނޑެވެ..

އެގޮތުން މިމެޗުގައި އޮޑީގެ ލަހުފާން އަހުމަދު ޝިޔާމް, އަބްދުالله ނައިސަމް ޖަލީލް މިއިން ކޮށްމެ ކުޅުންތެރިޔަކު ނުވަ ލަނޑު ކާމިޔާބުކުރިއިރު , އިސްމައިލް އިނާން ހަމްޒާ ވަނީ ހަ ލަނޑު ކާމިޔާބުކޮށްފައެވެ. އަދި އެޓީމުގެ މުހައްމަދު އަމްސާލް ހަ ލަނޑު ކާމިޔާބުކުރިއިރު, އަހުމަދު ރީހާން, ހުސައިން އަފްޒަލް, ހުސައިން ފަހުމީ އަބްދުލް ކަރީމް މިއިން ކޮންމެ ކުޅުންތެރިޔަކު ވަނީ ދެ ލަނޑު ކާމިޔާބުކޮށްދީފައެވެ. އަދި އެޓީމުގެ އަނެއް ލަނޑު ކާމިޔާބުކޮށްދިނީ މުހައްމަދު މައިހާން މުބީނުއެވެ.

މީގެ އިތުރުން މި މެޗުގައި އޮސްޕްރޭގެ މުހައްމަދު އިބްރާހިމް، އަޔާން ނިޔާޒް މިއިން ކޮންމެކުޅުންތެރިޔަކު ދެ ލަނޑު ކާމިޔާބުކުރިއިރު އާގިބު ޝިފާއު އުމަރު، މޫސާ މިންހާލް ހާޝިމް، އައިކް ސާދް، އަހުމަދު އަޒްހަދު އަލީ ރަޝީދު މިއިން ކޮންމެ ކުޅުންތެރިޔަކު ވަނީ އެއް ލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިޔަކަށް ހޮވިފައިވަނީ އޮޑި ސްޕޯޓްސް ކްލަބުގެ އަބްދުﷲ ނައިސަމް ޖަލީލްއެވެ.

މިނަތީޖާއެކު ކުޅުނު ދެމެޗުން ވެސް މޮޅުވެ ހަ ޕޮއިންޓާއެކު ގުރޫޕްގެ އެއްވަނާގައި އޮޑި އޮތްއިރު، މިމެޗުން ބަލިވި އޮސްޕްރޭ ކުޅުނު ދެމެޗުން ވެސް ބަލިވެފައިވާއިރު އެޓީމު މިވަގުތު އޮތީ ގުރޫޕްގެ ފުލުގައެވެ.

މިއަހަރުގެ މުބާރާތުގެ ފިރިހެން ދެވަނަ ޑިވިޝަނުގައި 16ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 16ޓީމު ހަތަރު ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެއެވެ.