ފަލްކަންސް ކަޓުވާލައި ބޮއްކުރާއިން ސެމީ ފައިނަލްގެ ޖާގައެއް ކަށަވަރުކޮށްފި

މިހާރު ކުރިއަށްދާ ރާއްޖޭގެ އެންމެ އަގުބޮޑު ފުޓްސަލް މުބާރާތް " ގައްދޫ ކައުންސިލް ފުޓްސަލް ޗެލެންޖް 2024" ގެ ފިރިހެން ޑިވިޝަނުގައި މިރޭ ބޮއްކުރާއި ފަލްކަންސް ވާދަކުރި މެޗު ފަސޭހަކަމާއެކު 7-0ގެ ނަތީޖާއަކުން ކާމިޔާބުކޮށް ބޮއްކުރާއިން ސެމީފައިނަލްގެ ޖާގައެއް ކަށަވަރުކޮށްފި އެވެ.

ފުރަތަމަ ހާފުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެން ދިޔަ މި މެޗުގެ ފުރަތަމަ ހާފުގައި ބޮއްކުރާއިން ވަނީ ތިން ލަނޑުގެ ލީޑެއް ނަގާފައެވެ. ފުރަތަމަ ހާފުގެ ކުޅުން ނިމިގެން ދިޔައީ 3-0ގެ ނަތީޖާއަކާއެކު ބިއްކުރާ ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު ފަސް ލަނޑު ވަނީ ކާމިޔާބުކޮށްފައެވެ.

އެގޮތުން މި މެޗުގައި ބޮއްކުރާގެ އިބްރާހިމް ސަނޫން ދެ ލަނޑު ކާމިޔާބުކުރި އިރު, ސާދު ނިޒާރު, އަހުމަދު ބައްސާމް މުހައްމަދު ނައީމް, މުހައްމަދު އިޔާދު އަލީ, އަނޫ އަބްދުالله, އަޔާޒް އަހުމަދު, މިއިން ކޮންމެ ކުޅުންތެރިޔަކު ވަނީ އެއް ލަނޑު ކާމިޔާބުކޮށްފައެވެ. މެޗުގައި ފަލްކަންސް އަށް ލަނޑުޖަހާނެ ރަނގަޅު ފުރުސަތުތަކެއް ލިބުނު ނަމަވެސް މެޗުގެ ކުޅުން ނިމިގެން ދިޔައީ އެޓީމަށް އެއްވެސް ލަނޑެއް ކާމިޔާބު ނުކުރެވި އެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ބޮއްކުރާގެ އަޔާޒް އަހުމަދު އެވެ.

މި ނަތީޖާއާއެކު ކުޅުނު ހަ މެޗުން ހޯދި ހަ ޕޮއިންޓާއެކު ފަލްކަންސް އިން މުބާރާތް ނިންމާލީ ތާވަލުގެ ފަސްވަނައިގައި އޮވެގެންނެވެ. އަދި ކުޅުނު ހަ މެޗުން ހޯދި 11 ޕޮއިންޓާއެކު ބޮއްކުރާ އިން ލީގުބުރު ނިންމާލީ ތާވަލުގެ ތިންވައިގައި އޮވެގެންނެވެ.

މިއަހަރުގެ މުބާރާތުގެ ސީނިއަރ ފިރިހެން ޑިވިޝަނުގައި ހަތް ޓީމަކުން ވާދަކުރަމުން އަންނައިރު، މިޑިވިޝަނުގެ މެޗުތައް ކުރިއަށްދަނީ ލީގުއުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީ ފައިނަލަށް ހޮވޭގޮތަށެވެ. އަދި ސެމީ ފައިނަލުން ބަލިވާ ދެޓީމުގެ މެދުގައި ތިންވަނަ ހޮވާ މެޗެއް ކުޅުމަށް ވަނީ ހަމަޖެހިފައެވެ.

25 އޮކްޓޯބަރު 2024 އިން 03 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރާއިރު، މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ގާފު ސްޕޯޓްސް އެވެ.