އައުޓްލޯ ބަލިކޮށް ތިނަދޫއިން ސެމީގެ އުއްމީދު ދަމަހަށްޓައިފި

މިހާރު ކުރިއަށްދާ ރާއްޖޭގެ އެންމެ އަގުބޮޑު ފުޓްސަލް މުބާރާތް " ގައްދޫ ކައުންސިލް ފުޓްސަލް ޗެލެންޖް 2024" ގެ ފިރިހެން ޑިވިޝަނުގައި މިރޭ ކުޅުނު ފުރަތަމަ މެޗުގައި އައުޓްލޯ ކިންގްސް އާއި ތިނަދޫ ކުޅުނު މެޗު ވާދަވެރި ކުޅުމަކަށްފަހު 2-0 ގެ ނަތީޖާއަކުން ތިނަދޫ ކާމިޔާބުކޮށްފިއެވެ.

މުބާރާތުގައި ތިނަދޫ ކުޅުނު ފުރަތަމަ މެޗުގައި އެންމެ ފަހުގެ ޗެންޕިއަން ބޮއްކުރާ އަތުން 3-0 ގެ ނަތީޖާއަކުން ބަލިވިއިރު، ދެވަނަ މެޗުގައި ގަސްދޮށު އެސްސީ އަތުން އެޓީމު ބަލިވީ 6-0 ގެ ތަފާތުބޮޑު ނަތީޖާއަކުންނެވެ. އަދި އައުޓްލޯގެ ފުރަތަމަ މެޗުގައި 3-1 ގެ ނަތީޖާއަކުން އުތުރުކޮޑާ އަތުން ބަލިވިއިރު، ދެވަނަ މެޗުގައި ބޮއްކުރާ އަތުން އެޓީމު ބަލިވީ 4-1 ގެ ނަތީޖާއަކުންނެވެ.

ގައްދޫ ފުޓްސަލް ދަނޑުގައި ކުޅުނު މިމެޗުގެ ފުރަތަމަ ހާފުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުން ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި0-0 ގެ ނަތީޖާއަކުން ދެޓީމު އެއްވަރުވެގެންނެވެ.

މެޗުގެ ދެވަނަ ހާފުގައި ތިނަދޫ ވަނީ އެޓީމުގެ ކުޅުން ރަނގަޅުކޮށް ގިނަވަގުތު ބޯޅަތައް ހިފަހައްޓާ އެޓޭކުތައް އިތުރަށް ވަރުގަދަކޮށް ފައެވެ. ނަތީޖާއެއްގެ ގޮތުން މިހާފުގަ ހަ ވަަނަ މިނުޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑުހޯދާފައެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ އަހުމަދު ޒައިދް މުހައްމަދު ނައީމްއެވެ. އަދި މެޗުގައި ތިނަދޫއިން ކާމިޔާބުކުރި ދެވަނަ ގޯލް ކާމިޔާބުކޮށްފައިވަނީ މެޗުގެ ފަހުވަގުތުގައި އެޓީމުގެ އަލީ ވިފާގު އެވެ. ދެވަނަ ހާފުގެ 17ވަނަ މިނެޓުގައި އައުޓްލޯގެ އަލީ ސިނާހު ކުރި ފައުލަކާ ގުޅިގެން އޭނާއަށް ވަނީ ރަތް ކާޑެއް ދައްކާފައެވެ. މި ކާޑު ދައްކާފައިވަނީ މި މުބާރާތުގައި ބޭނުންކުރަމުން އަންނަ "ވީޑިއޯ ސަޕޯޓް" އިން ރިވިއުކުރުމަށްފަހު އެވެ.

މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބުނުކުރެވި 0-2 ގެ ނަތީޖާއަކުން ތިނަދޫ ކުރީގައި އޮވެގެންނެވެ. މިމެޗުގެ މޮޅު ކުޅުންތެރިއަކަށް ހޮވުނީ ތިނަދޫގެ އަލީ ވިފާގު އެވެ.

މިއަހަރުގެ މުބާރާތުގެ ސީނިއަރ ފިރިހެން ޑިވިޝަނުގައި ހަތް ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ލީގުއުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީ ފައިނަލަށް ހޮވޭގޮތަށެވެ. އަދި ސެމީ ފައިނަލުން ބަލިވާ ދެޓީމުގެ މެދުގައި ތިންވަނަ ހޮވާ މެޗެއް ކުޅުމަށް ވަނީ ހަމަޖެހިފައެވެ.

25 އޮކްޓޯބަރު 2024 އިން 03 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރާއިރު، މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ގާފު ސްޕޯޓްސް އެވެ.