ވާދަވެރި ކުޅުމަކަށްފަހު ބޮއްކުރާއިން އައުޓްލޯ ކިންގްސް ބަލިކޮށްފި

މިހާރު ކުރިއަށްދާ ރާއްޖޭގެ އެންމެ އަގުބޮޑު ފުޓްސަލް މުބާރާތް " ގައްދޫ ކައުންސިލް ފުޓްސަލް ޗެލެންޖް 2024" ގެ ފިރިހެން ޑިވިޝަނުގައި މިރޭ ކުޅުނު ފުރަތަމަ މެޗުގައި އެންމެ ފަހުގެ ޗެންޕިއަން ބޮއްކުރާއި، އައުޓްލޯ ކިންގްސް ކުޅުނު މެޗު ވާދަވެރިކުޅުމަކަށްފަހު 4-1 ގެ ނަތީޖާ އަކުން ބޮއްކުރާ އިން ކާމިޔާބުކޮށްފިއެވެ.

މުބާރާތުގައި ބޮއްކުރާ ކުޅުނު ފުރަތަމަ މެޗުގައި 3-0 ގެ ނަތީޖާއަކުން ތިނަދޫ އަތުން އެޓީމު މޮޅުވެފައިވާއިރު، އައުޓްލޯގެ ފުރަތަމަ މެޗުގައި އެންމެ ފަހުގެ ރަނަރަޕް އުތުރުކޮޑާ އަތުން 3-1 ގެ ނަތީޖާއަކުން އެޓީމު ވަނީ ބަލިވެފައެވެ.

ގައްދޫ ފުޓްސަލް ދަނޑުގައި ކުޅުނު މިމެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ އިރު, މެޗުގެ ފުރަތަމަ ލީޑު ނަގާ ކުރިހޯދީ ބޮއްކުރާ ޓީމުން, އެޓީމުގެ ބައްސާމް 10 ވަނަ މިނުޓުގައި ކާމިޔާބުކުރި ލަނޑުންނެވެ. އަދި ޖެހިގެން އައި މިނުޓުގައިވެސް ލަނޑެއް ކާމިޔާާބުކޮށް ބޮއްކުރާ ވަނީ ލީޑު ފުޅާ ކޮށްފައެވެ. އެގޮތުން މި ލަނޑު އެ ޓީމަށް ކާމިޔާބުކޮށްދީފައިވަނީ އިބްރާހިމް ސަނޫން އެވެ. އަދި މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ގިނަ ފުރުސަތުތަކެއް ތަނަވަސްކޮށް ފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުން ކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-0 ގެ ނަތީޖާއަކުން ބޮއްކުރާ ކުރީގައި އޮވެގެންނެވެ.

މެޗުގެ ދެވަނަ ހާފުގައި ބޮއްކުރާއިން ވަނީ އިތުރު ދެ ލަނޑު ކާމިޔާބުކޮށް ލީޑު އިތުރަށް ފުޅާކޮށްފައެވެ. އެގޮތުން ބޮއްކުރާ ޓީމަށް މި ދެ ލަނޑުވެސް ކާމިޔާބުކޮށްދިނީ އަހުމަދު ބައްސާމްއެވެ. މި މެޗުގައި އައުޓްލޯ ކިންގުން ކާމިޔާބުކުރި ހަމައެކަނި ގޯލް ކާމިޔާބުކޮށްދީފައިވަނީ ލިބުނު ޕެނަލްޓީއަކުން އަބްދުالله ތަހުސީން އެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ބޮއްކުރާ ޓީމުގެ އަޔާޒް އަހުމަދު އެވެ.

މިނަތީޖާއެކު ކުޅުނު ދެމެޗުން މޮޅުވެ ހަ ޕޮއިންޓާއެކު ލީގު ތާވަލުގެ އެއްވަނާގައި ބޮއްކުރާ އޮތްއިރު، މިމެޗުން ބަލިވި އައުޓްލޯ ކިންގްސް ކުޅުނު ދެމެޗުން ވެސް ބަލިވެފައިވާއިރު ޕޮއިންޓެއް ނުލިބި އެޓީމު މިވަގުތު އޮތީ ލީގު ތާވަލުގެ ފުލުގައެވެ.

މިއަހަރުގެ މުބާރާތުގެ ސީނިއަރ ފިރިހެން ޑިވިޝަނުގައި ހަތް ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދުއުމަށް ހަމަޖެހިފައިވަނީ ލީގުއުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީ ފައިނަލަށް ހޮވޭގޮތަށެވެ. އަދި ސެމީ ފައިނަލުން ބަލިވާ ދެޓީމުގެ މެދުގައި ތިންވަނަ ހޮވާ މެޗެއް ކުޅުމަށް ވަނީ ހަމަޖެހިފައެވެ.

25 އޮކްޓޯބަރު 2024 އިން 03 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރާއިރު، މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ގާފު ސްޕޯޓްސް އެވެ.