ވާދަވެރި ކުޅުމަކަށްފަހު އައުޓްލޯ ކިންގްސް ބަލިކޮށް އުތުރުކޮޑާއިން ފެށުން ރަނގަޅުކޮށްފި

މިހާރު ކުރިއަށްދާ "ގައްދޫ ކައުންސިލް ފުޓްސަލް ޗެލެންޖް 2024" ގެ ފިރިހެން ޑިވިޝަނުގައި މިރޭ ކުޅެވުނު ފުރަތަމަ މެޗުގައި އައުޓްލޯ ކިންގްސް އާއި އެންމެ ފަހުގެ ރަނަރަޕް އުތުރުކޮޑާ ވާދަކުރި މެޗު 3-1 ގެ ނަތީޖާއަކުން ކާމިޔާބުކޮށް އުތުރުކޮޑާއިން މުބާރާތުގެ ފެށުން ރަނގަޅުކޮށްފި އެވެ.

ގައްދޫ ފުޓްސަލް ދަނޑުގައި ކުޅުނު މިމެޗުގެ ފުރަތަމަ ހާފުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި, ފުރަތަމަ ލަނޑު ޖަހައި ކުރިހޯދީ އުތުރުކޮޑާއިންނެވެ. މި ލަނޑު މެޗު ފެށިގެން ދެވަނަ މިނެޓުގައި ކާމިޔާބުކޮށްދިނީ އެޓީމުގެ އަލީ ޝިޔާހު އެވެ. އަދި އޭގެ ތިން މިނެޓް ފަހުން އެޓީމުގެ ލީޑު ފުޅާކޮށްދިނީ އަބްދުالله ޝާފިއު އެވެ. މީގެ އިތުރުންވެސް މިހާފުގައި ދެޓީމުންވެސް ވަނީ ލަނޑު ޖަހާނެ ރަނގަޅު ގިނަ ފުުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-0 ގެ ނަތީޖާއަކުން އުތުރުކޮޑާ ކުރީގައި އޮވެގެންނެވެ.

މެޗުގެ ދެވަނަ ހާފު ވަރުގަދަކޮށް ފެށީ އައުޓްލޯ ކިންގްސް އިންނެވެ. ނަތީޖާއެއްގެ ގޮތުން ދެވަނަ ހާފުގެ ފުރަތަމަ މިނެޓުގައި އައުޓްލޯގެ އަބްދުالله ތަހުސީން ވަނީ އެޓީމަށް ލަނޑެއް ކާމިޔާބުކޮށްދީ ނަތީޖާގެ ފަރަގު ކުޑަކޮށްފައެވެ. އަދި ދެވަނަ ހާފުގެ ނުވަވަނަ މިނެޓުގައި އުތުރުކޮޑާގެ މުހައްމަދު އައްޒާމް ވަނީ ލަނޑެއް ކާމިޔާބުކޮށް އެޓީމަށް ލީޑު ފުޅާކޮށްދީފައެވެ. މީގެ އިތުރުންވެސް މިހާފުގައި ދެޓީމުންވެސް ލަނޑު ޖަހާނެ ރަނގަޅު ގިނަ ފުުރުސަތުތަކެއް ތަނަވަސްކުރި ނަމަވެސްމެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 3-1 ގެ ނަތީޖާއަކުން އުތުރުކޮޑާ ކުރީގައި އޮވެގެންނެވެ. އަދި މި މެޗުގެ މޮޅު ކުޅުންތެރިޔަކަށް ހޮވިފައިވަނީ އުތުރުކޮޑާގެ އަލީ ޝިޔާހު އެވެ.

މިއަހަރުގެ މުބާރާތުގެ ސީނިއަރ ފިރިހެން ޑިވިޝަނުގައި ހަތް ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދުއުމަށް ހަމަޖެހިފައިވަނީ ލީގުއުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީ ފައިނަލަށް ހޮވޭގޮތަށެވެ. އަދި ސެމީ ފައިނަލުން ބަލިވާ ދެޓީމުގެ މެދުގައި ތިންވަނަ ހޮވާ މެޗެއް ކުޅުމަށް ވަނީ ހަމަޖެހިފައެވެ.

25 އޮކްޓޯބަރު 2024 އިން 03 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރާއިރު، މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ގާފު ސްޕޯޓްސް އެވެ.