ފާއިތުވި ހަފްތާގެ ތެރޭގައި 70 އަށް ވުރެ ޔަހޫދީ ސިފައިން މަރާލައިފިން - ހިޒްބުالله

ފާއިތުވި ހަފްތާއެއްހާ ދުވަހުގެ ތެރޭގައި ނިރުބަވެރި އިޒްރޭލު އަސްކަރިއްޔާގެ 70 އަށްވުރެ ގިނަ ސިފައިން މަރާލާފައިވާ ކަމަށް ހިޒްބުالله އިން ބުނެފި އެވެ.

ހިޒްބުالله އިން މިރޭ ނެރުނު ބަޔާނެއްގައި ބުނީ އިސްރާއީލު ސިފައިންނާ އެކު ހިނގި ކުރިމަތިލުންތަކުގައި އިސްރާއީލު ސިފައިންގެ 70 އަށް ވުރެ ގިނަ ސިފައިން މަރާލާފައިވާ ކަމަށެވެ. ނަމަވެސް ސީދާ އަދަދެއް ހާމަކޮށްފައެއް ނުވެއެވެ.

މިދިޔަ ހަފުތާގައި ހިޒްބުالله އިން ނެރުނު ބަޔާނެއްގައި ބުނެފައި ވަނީ މި މަހުގެ ކުރީކޮޅު ޔަހޫދީ އިޒްރޭލުން ލުބުނާނަށް އެއްގަމު މަގުން އެރި ފަހުން އިޒްރޭލުގެ 55 މީހުން މަރާލި ކަމަށެވެ. އެހެން ކަމުން ހިޒްބުالله އިން މިއަދު ނެރުނު ބަޔާނުގައި ވާ މައުލޫމާތު ސައްހަ ނަމަ މިއީ މިހާތަނަށް ހިޒްބުالله ގެ ހަމަލާތަކުގައި މިހާ ގިނަ ޔަހޫދީ ސިފައިން މަރާލި ފުރަތަމަ ފަހަރެވެ.

އިސްރާއީލުން ބުނީ ލުބުނާނުގެ އެއްގަމު އޮޕަރޭޝަންތައް ފެށިފަހުން ލުބްނާނުގެ އެތެރޭގައި ގާތްގަނޑަކަށް 20 ސިފައިން މަރުވި ކަމަށާއި އިޒްރޭލުގެ އުތުރުގެ ސަރަހައްދަށް ހިޒްބުالله އިން ދިން ހަމަލާތަކުގައި އިތުރު 30 ސިފައިން މަރުވި ކަމަށެވެ. ނަމަވެސް މި އަދަދުތައް މަތިވާނެ ކަމަށް ބޭރުގެ އިތުބާރު ހުރި ރިޕޯޓުތައް ބުނެއެވެ.

ފާއިތުވި ހަފްތާއަކީ ހިޒްބުالله އިން އިޒްރޭލަށް އެންމެ ވަރުގަދަ ހަމަލާތަކެއް ދިން ހަފްތާއެވެ. މިކަމަށް ހުދު އިޒްރޭލުންވެސް ދަނީ އެއްބަސްވަމުންނެވެ.

ހިޒްބުالله ގެ ހަމަލާތައް ވަރުގަދަ ކޮށްފައިވަނީ ޔަހޫދީން އެ ޖަމާއަތުގެ ކޮމާންޑަރު އަދި އިސް ލީޑަރު ހަސަން ނަސްރުالله އަވަހާރަކޮށްލުމުގެ ބަދަލު ހިފުމުގެ ގޮތުންނެވެ.